InfoHub Logo

Qazaqstan mektepteriniń oqý baǵdarlamasyna shahmat oıyny fakúltatıvti pán retinde engizilmek. Atalǵan jańashyldyq búginde birneshe óńirde pılottyq joba retinde iske asyp jatyr. Bul týraly Qazaqstan shahmat federasıasynyń birinshi vıse-prezıdenti Dármen Sádýaqasov málim etti.

«Biz ótken jyly maýsymda «Mekteptegi shahmat» jobasyn qolǵa alǵan bolatynbyz. Memleket basshysymen shahmatty mektep baǵdarlamasyna fakúltatıvtik pán retinde engizý týraly kelistik. Biz 1- 4 synyptardan bastaǵymyz kelip otyr, árıne qıynǵa soǵady. Sebebi ol naqty ári tekserilgen daıyndyqty qajet etedi. Daıyndyq barysynda biz ishki sarapshylar tobyn jumyldyrdyq. Sonymen qatar osy kúnderi shahmattan Astanada ótip jatqan álem chempıonaty aıasynda AQSH, Eýropa elderi, postkeńesti jáne Ońtústik-SHyǵys Azıa sıaqty birqatar elderdiń sarapshylarynyń qatysýymen halyqaralyq konferensıa ótkizdik», – dedi Dármen Sádýaqasov ortalyq komýnıkasıalar alańynda ótken baspasóz máslıhatynda.

Onyń aıtýynsha, shahmatty mektep baǵdarlamasyna engizý jumysyna bilim salasynyń mamandary men mektep, joǵary oqý oryndarynyń oqytýshylary tartyldy.

Olar halyqaralyq tájirıbeni nazarǵa aldy.

«Elimizde shahmat oıynyn damytý maqsatynda federasıanyń aldynda turǵan birqatar qosalqy mindetter bar. Jalpy shahmatty mektepke engizý pılottyq joba retinde Pavlodar oblysy, Shymkent qalasy jáne Túrkistan oblysynda júzege asyp jatyr. Búginde jalpy sany 30-dan astam mektepte engizilgen. 3 jyl boıǵy aprobasıa barysynda shahmattyń balalardyń úlgerimi men qabiletin damytýda oń nátıjeni baıqadyq. Ol boıynsha araptamalyq qorytyndy jasaldy. Barlyq ǵylymı tásilder boıynsha shahmattyń balanyń damýyna oń áser etetindigi dáleldendi», – deıdi ol.

Mektep oqýshylaryna shahmat úıretý orys jáne qazaq tilderinde ótedi.

---