InfoHub Logo

Qytaı eliniń Shanhaı pedagogıkalyq ýnıversıtetinde bilimin jetildirgen pavlodarlyq túlek Farıda Tóleýbaeva jyl stýdenti atandy. Ol qatarlastarynan top jaryp shyqqany úshin sheteldik stýdentter fakúltetiniń dekany Hýang MeıSúdiń atynan eki birdeı dıplomǵa ıe bolǵan, dep habarlaıdy pavlodarnews.kz.

«Qytaı elinde ekologıalyq másele kún saıyn artyp keledi. Sondyqtan munda betperde kıip júrý úırenshikti ádetke aınalǵan. Qyr asyp, bilim  jolyna túsken men sıaqty qazaqstandyq jastar úshin týǵan eldiń kók aspanyn tamashalap, taza aýasymen demalýdan asqan baqyt joq shyǵar, sirá. Sondaı-aq,  ózimizdiń ulttyq taǵamdarǵa teń keletin as joq ekenine kózim jetti. Tipti, bir jyldyń ishinde naǵyz ettiń dámin umytyp qalǵan tárizdimin. Kúndelikti asqa taýyq eti jáne kúrishti paıdalanamyz. Úıge oralýǵa úsh kún qaldy.  Mınýttardy sanap otyrmyn desem bolady. Anamnyń ystyq baýyrsaǵyn qatty saǵyndym, - deıdi "Jas daryn" mamandandyrylǵan mektebiniń túlegi, "Altyn belgi" ıegeri.

Búginde 20 jastaǵy stýdent qytaı tilindegi kitaptar men jýrnaldardy erkin oqı alatyn deńgeıge jetken. Koreıa, Japonıa, Kolýmbıa, Kanada, Mońǵolıa, Reseı, Germanıa, Slovakıa jáne Italıa elderinen kelgen jastarmen dostasyp ketken Farıda sońǵy kezderi koreı tilin úırenýge den qoıǵan.

«Endi  álemniń túkpir-túkpirinde aralasatyn  dostarym bar.  Elbasynyń úsh tuǵyrly til saıasatyna  men de óz úlesimdi qosýǵa tyrysamyn. Bar armanym - bolashaqta elimizdiń qaryshtap damýyna atsalysý. Meniń shetelde bilim alýyma qoldaý kórsetken  anam men ál-Farabı atyndaǵy qazaq ulttyq ýnıversıteti qytaı tili kafedrasynyń ustazdaryna alǵysym zor», - deıdi Farıda.  

---