InfoHub Logo

Búgin sabaqqa eki qyzyl ádemi alma alyp keldim. Balalar muny kórmedi, biraq almanyń bireýin bildirtpeı, birneshe ret edenge uryp aldym, al syrtynan olar birdeı-tuǵyn.

Men almany qolyma alyp (edenge qulaǵanyn), onyń qandaı suryqsyz ekenin aıta bastadym: qısyq jáne túsi de jaman dedim. Keıin balalarǵa maǵan qosylýyn suradym (olar meni esinen adasty dep oılap qaldy, bilem) jáne almany birdeńe dep kelemejdeýlerin suradym. Oǵan qandaı ǵana at qoımadyq deseńshi: «Sasyq alma», «Seni kim jeıdi deısiń» jáne t.b. Meniń tipti oǵan janym ashyp ketti.

Al keıin men ekinshi almany aldym, biz ony barynsha maqtaýǵa tyrystyq: «Sen tamasha almasyń», «Seniń qabyǵyń sondaı balǵyn», «Túsiń jarqyn». Men balalarǵa eki almany da kórsettim – olardy aıyrý múmkin emes edi, ekeýi de syrtynan tartymdy. Biraq osy kezde men qolyma pyshaq alyp, eki jemisti de ortasynan bóldim: olardyń bireýi tegis, ishi ádemi boldy, al biz jaman sózder aıtyp tastaǵan ekinshisiniń ishinde daqtar paıda bolyp, kógerip qalǵany baıqaldy.

Osy kezde balalardyń oıynda birdeńe jarq ete qaldy dep oılaımyn. Ómirde de osylaı: adamnyń kóńiline tıetin sózder aıtqanda, onyń janyn jaralaımyz – dál almanyń ishindegi daqtar sıaqty. Kelemejderdiń qurbany bolǵan adamdar (balalar) ishki dúnıesinde ne bolyp jatqanyn bildirmeıdi, alma bolmasa, biz muny kórmeıtin de edik. Syrtynan adam baqytty, kóńildi bolyp júrýi múmkin, biraq ishinde bireýdiń jasaǵan aýyrtpalyǵynan qaıǵyryp júrýi múmkin.

Jáne bizdiń muny túzeýge múmkindigimiz bar. Jaǵymsyz, kóńilge tıetin sózder adamǵa qanshalyqty zıan tıgizetinin biz balalarǵa kórsete alamyz. Biz balalarymyzdy bir-birin qorǵaýǵa, meıirimdi bolýǵa úırete alamyz. Sóz – bul judyryq emes, ura almaıdy, biraq ol júrekti jaralaýy múmkin. Sondyqtan aıtatyn sózińizge abaı bolyńyz.

Derekkóz: Relax Kids Tamworth / Facebook

Prevúge sýret: Relax Kids Tamworth / Facebook

Aýdarma: bilim-all.kz

---