InfoHub Logo

Aldan endi osynda kelgenine ókinip otyr. Ózi áldeneden qoryqqandaı qımylsyz otyr. Aldannyń aýyldaǵy bálekeı kelinshegi men bir-birine irkes-tirkes dúnıege kelgen aıýdyń qonjyǵyndaı qos ulyna dep satyp alǵan zattary bar dorbasy aıaq kıimder sheshetin jerde bosaǵada súıeýli tur. Aldannyń qarny ashyp-aq otyr. Biraq aldyndaǵy ústeldiń ústinde turǵan tamaqty jeýge tórde tóbedeı bolyp uzynynan túsip sulap jatqan erkekten batpaı otyr. Óıtkeni osy tamaq ta, dastarqannyń ıesi de - osy kisi. Aldan sonyń qabaǵyna qarap otyr. Tamaqqa qolyn sozaıyn dese, qasyǵy shyq etip ydystyń shetine tıip ketetin sekildi. Aldyndaǵy kesede turǵan shaıdy urttaıyn dese, jutqynshaǵy qulq ete qalatyn sıaqty. Tórdegi erkektiń mysy ábden-aq basyp, berekesi qashyp otyr. Baǵana aýylyna baratyn avtobýsy kelemin degenshe, kósheden birdeńe jeı salmaı, osy úıge kelgenine qynjylyp-aq otyr. Shaı quıyp otyrǵan taramystaı qatqan qara áıel Aldanǵa bir-eki ret "shaı ish" dep kúbir etti. Tórde tóbedeı bop jatqan erkek qasyqty toltyryp alyp, aýzyna asaıdy da, urty bult-bult etip shaınańdaıdy. Bir kezde aýzyna tamaqty toltyryp asady da, jaǵy syrt-syrt etip shaınap otyryp, Aldannyń arqa tusyndaǵy irgeni kórsetip "im, im..." dedi. Aldan artyna burylyp qaraǵanda irgege taqala jatqan gazetti kórdi. "Gazet pe?" - dedi Aldan. "İm... İm". Erkek shaınańdap otyryp, basyn ızedi. Aldan gazetti qolyn sozyp-aq alyp bere alatyn edi. Biraq, nege ekendigi belgisiz, ornynan ushyp turdy. Sóıtti de, jep-jeńil gazetti qos qoldaı kóterip, alaqanyna salǵan kúıi beıne bir mártebeli meımanǵa qyzmet jasap jatqan daıashydaı erkekke iltıpatpen usyndy. Erkek Aldannyń munysyna mán de bergen joq. Gazetti qolyna alǵan kúıi shyntaqtap jatqan jastyǵynyń arjaǵyna jaıa salyp, jastyqty baýyryna jıyp alǵan kúıi etpetinen aýdarylyp tústi.

Aldan endi erkektiń kújireıip jatqan jotasynan qarap otyr. Erkek gazettiń betinen áldebir anekdot pa, ázil me, birdeńe oqyǵan bolý kerek, jaýyryny búlkildeı túsip turyp kúldi. Aldan osy sátti paıdalanyp qasyǵyn tamaqqa júgirtip-júgirtip aldy. Kesedegi shaıyn da júdemelete-júdemelete ishti. Osynyń ózine-aq qarny toǵaıyp qalǵan edi. Sonan soń kesesin doǵaryp baryp, betin sıpady. "Áli erte emes pe?" Áıel kúbir etti. "Bara beremin ǵoı".

Aldan ornynan kóterildi. Tórde jatqan erkekke saý bolyńyz degendeı birdene aıtqysy kelip turyp, biraq bata almady. Aıaq kıimder turǵan jerdegi qalanyń shańy aıaýsyz-aq qonǵan týflıyn aıaǵyna suqty. Sonan soń sol jerde jatqan shótkeni ala salyp, ysqylap-ysqylap jiberdi. Sóıtti de, bosaǵada turǵan dorbasyn qolyna ustaǵan kúıi belin jazyp, qonaǵyn shyǵaryp salýǵa janyna kelip turǵan áıelge:

- Saý bolyńyz, - dedi.

Áıeldiń úni bolar-bolmas estildi:

- Úı-ishińe sálem aıt.

Aldan syrtqy esikti ashyp, esik aldyna shyqty. Jotasy kújireıip shynjyrda jatqan alpamsadaı tóbet Aldandy kóre salyp, ars-ars etip umtyldy. Aldan typyń-typyń etip qaqpanyń janyndaǵy kishkene esikten shyǵyp úlgerdi. Esik sońynan sart etip jabyldy. Aldan eni tar jaıaý júrginshi júretin jolǵa túskisi kelmegendeı, kólik júretin keń kóshege shyǵyp alyp, keýdesin kere turyp bir tynys aldy.

---