InfoHub Logo

28-shi qysqy Ýnıversıada

Shamamen bir aıdan keıin Almaty qalasynda 28-shi Dúnıejúzilik qysqy Ýnıversıada oıyndary bastalady. Búkilálemdik stýdentter oıynyna 2 myńǵa jýyq sportshy qatysady jáne 3 myńǵa jýyq erikti jumys istemek. Eriktiler arasynda sheteldikter de bar.

Ýnıversıada baǵdarlamasyna mánerlep syrǵanaý, short-trek, taý shańǵysy, shaıbaly hokeı (erler, áıelder), snoýbord, bıatlon, shańǵy jarysy, kerlıng, shańǵymen tuǵyrdan sekirý, shańǵy qossaıysy, kónkımen júgirý, frıstaıl sekildi 12 sport túri enedi. Qazaqstan atynan Denıs Ten, Abzal Raqymǵalıev, Aıza Imanbek, Galına Vıshnevskaıa syndy belgili sportshylar synǵa túsedi.
Ýnıversıadaǵa 30 myń otandyq jáne sheteldik týrıs keledi dep josparlanǵan jáne álemniń 80 elinen 1 mlrd kórermen teletranslásıa arqyly kóre alady.

EKSPO-2017 kórmesi

«Bolashaq energıasy» taqyrybymen ótetin Halyqaralyq mamandandyrylǵan EKSPO-2017 kórmesi 2017 jyldyń 10 maýsym - 10 qyrkúıek aralyǵynda Astana qalasynda ótedi. Kórmege 5 mıllıon týrıs keledi dep kútilýde.

Kórme bıletteriniń quny 6 myń teńgeden bastalady. Barlyq Qazaqstan boıynsha offlaın-kassalar 2016 jyly 1 qyrkúıekte ashyldy.
Kórme arqyly elimizge iri ınvestısıalar tartý jáne respýblıkamyzdyń ekonomıkalyq jáne ınfraqurylymdyq damýyn qosymsha yntalandyrý múmkindigi artady.

EKSPO qalashyǵy men túrli joba nysandary kórme aıaqtalǵannan keıin de, qala turǵyndary men qonaqtary úshin qyzmet etetin bolady. Joba barysynda qonaq úı retinde soǵylǵan kópqabatty ǵımarattar qala ákimdigine ótip, turǵyn úılerdiń qataryn tolyqtyrady. Sol arqyly qalalyq ákimdik turǵyn úı máselesin ońtaılandyrýdy kózdep otyr.

SHYU-ǵa Qazaqstannyń tóraǵalyq etýi

2016 jyldyń 24 maýsymnan 2017 jyldyń 8-9 maýsymyna deıin Shanhaı yntymaqtastyq uıymyna Qazaqstan tóraǵalyq etedi jáne maýsym aıynda SHYU-nyń kezekti samıti Astana qalasynda ótedi. QR Prezıdenti Nursultan Nazarbaev óńirlik qaýipsizdikti qamtamasyz etý, ekonomıkalyq qarym-qatynasty nyǵaıtý, kóliktik-tranzıttik áleýetti keńeıtý jáne mádenı-gýmanıtarlyq yqpaldastyqty alǵa jyljytý máselelerin Qazaqstannyń SHYU-ǵa tóraǵalyǵynyń basymdyqtary retinde atap ótti. 

Shanhaı yntymaqtastyq uıymy 2001 jyly alty memlekettiń bastamasymen quryldy. Keler jyly Astanada ótetin samıtte Úndistan men Pákistandy uıym músheligine qabyldaý máselesi talqylanady.

BUU Qaýipsizdik keńesi

Bıyl maýsym aıynyń 28-inde Qazaqstan Azıa toby memleketteriniń atynan 2017-2018 jyldarǵa Birikken Ulttar Uıymy Qaýipsizdik Keńesiniń turaqty emes múshesi bolyp saılandy. Nú-Iorktegi BUU Bas Assambleıasynda ótken daýys berýdiń nátıjesinde 138 memleket Qazaqstannyń kandıdatýrasyn qoldady. Al qazaqstandyq ótinimniń jalǵyz básekelesi - Taıland Koróldigi úshin 50-den astam memleket daýys bergen edi.

QR Syrtqy ister mınıstri Erlan Ydyrysovtyń aıtýynsha, Qazaqstannyń BUU Qaýipsizdik Keńesine saılanýy aımaqtyń shıelenisti jaǵdaılaryna álemdik qaýymdastyqtyń nazaryn aýdarýǵa, memlekettiń halyqaralyq bastamalaryn iske asyrýǵa, Astananyń jahandyq máselelerde mańyzdy ról atqaryp, «Eýrazıa keńistigindegi qaýipsizdik pen turaqtylyq faktory» retinde Qazaqstannyń ımıjin kóterýge sebep bolmaq.

BUU Qaýipsizdik Keńesine 15 memleket múshe bolady. Olardyń beseýi turaqty: AQSH, Qytaı, Reseı, Ulybrıtanıa jáne Fransıa. Al qalǵan on turaqty emes múshesi BUU Bas assambleıasy arqyly eki jyldyq merzimge saılanyp otyrady. Qazaqstan buǵan deıin Azıa elderi tobynan saılanǵan Malaızıany almastyratyn bolady.

Keler jyly Dúnıejúzilik boks keńesiniń (WBC) 55-shi konvensıasy Qazaqstanda ótedi dep kútilýde. Al 7-22 shilde kúnderi «Jibek joly» halyqaralyq rallı-reıdi qazaq dalasynan ótedi. 

Sondaı-aq, 1917 jyly Álıhan Bókeıhanov bastaǵan ult zıalylary qurǵan Alashorda úkimetiniń 100 jyldyǵy kele jatyr. Qazaqtyń tuńǵysh ulttyq-beıresmı basylymdary «Serke» jáne «Qazaq» gazetterine bıyl 110 jyl tolmaq. Sonymen birge, Názıpa Quljanovanyń 130 jyldyǵy, Muhtar Áýezovtiń 120 jyldyǵy, Asanáli Áshimov (80 jas), Nurǵalı Núsipjanov (80 jas), Smaǵul Elýbaev (70 jas), Lakı Kesoglý (70 jas), Roza Rymbaeva (60 jas) sekildi birtýar qazaq tulǵalary mereıli jasqa tolady.

---