InfoHub Logo

Qazaqstan Prezıdenti Qasym-Jomart Toqaev 2021 jyldy Táýelsizdiktiń 30 jyldyǵy retinde jarıalady.

«Ulttyq qoǵamdyq senim keńesiniń IV otyrysynda 2021 jyldy Táýelsizdiktiń 30 jyldyǵy dep jarıalaý týraly sheshimimdi aıttym. Bul ótken jolymyzdy zerdeleýge jaqsy múmkindik. Mereıtoı saıası-ekonomıkalyq reformalar, sıfrlandyrý, balalar men múgedekterdiń quqyǵyn qorǵaý, ekologıa máselesin sheshý aıasynda ótedi», - dep jazdy Qasym-Jomart Toqaev.

Táýelsizdik – kez kelgen halyqtyń eń úlken qundylyǵy. Óıtkeni táýelsizdik joq jerde erkin damý múmkin emes. Táýelsizdikti qadirleý, ony baǵalaı bilý, saqtaı bilý – barshamyzdyń basty paryzymyz. Byltyr táýelsizdik kúnin aýyr jaǵdaıda qarsy aldyq. Koronavırýs indeti bizge ǵana emes, búkil adamzatqa úlken shyǵyn ákeldi. Degenmen pandemıa kezindegi qıyndyqtarǵa qaramastan el qambasy astyqqa toldy. Jańa joldar salyndy, turǵyn úıler men ınfraqurylymdyq nysandar boı kóterdi. Bir sózben aıtqanda, tirshilik toqtap qalǵan joq. Ómir óz aǵysymen jalǵasyp jatyr. Bıyl dıqandarymyz 20 mıllıon tonna bıdaı jınady. Bul ishki suranysty qamtamasyz etýge, sondaı-aq shetelge eksporttaýǵa da jetedi. 10 mıllıon sharshy metrden astam turǵyn úı salyndy. 2600 shaqyrym tas jol paıdalanýǵa berildi. Elimizdiń 10  mıllıonǵa jýyq turǵyny kógildir otynǵa qol jetkizdi. Sıfrlandyrý barysynda júzdegen aýyl ınternetke qosyldy.

Prezıdent Táýelsizdiktiń 30 jyldyǵyn merekeleýge daıyndyq jónindegi memlekettik komısıany qurý týraly Jarlyqqa qol qoıdy. Komısıa quramy belgili memlekettik jáne qoǵam qaıratkerleri, saıası partıalar men úkimettik emes sektor ókilderinen turady. Memlekettik komısıa tóraǵasy – el Prezıdenti. Táýelsizdiń kúnine arnalǵan memlekettik nagradalar men syılyqtar tapsyrýǵa arnalǵan saltanatty rásimde:

«Biz qasterli Táýelsizdiktiń otyz jyldyǵyna qadam basamyz. Bul – barshamyzǵa ortaq ónegeli ólshem, taǵylymdy kezeń. Jańa memleket qurýǵa atsalysqan búkil halqymyzdyń eren eńbeginiń tarıhı shejiresi. Sondyqtan, men kelesi jyldy «Táýelsizdiktiń 30 jyldyǵy» dep jarıaladym. Ótken árbir on jyldyq atqarǵan mısıasy turǵysynan ǵasyrdyń júgin arqalap tur.Alǵashqy on jyldyq egemen Qazaqstannyń óz derbestigin qalyptastyrý kezeńi boldy. Ekinshi on jyldyqta elimiz tuǵyryn nyqtap, keregesin keńeıtip, irgesin bekitti.  Úshinshi on jyldyqta memleketimiz shyn máninde kemeline kelip, álemdik saıasattyń tórine ozdy. Aldaǵy tórtinshi on jyldyqta bizdi jańa mindetter kútip tur.»-dedi Qasym-Jomart Toqaev

Ý.M.Djoldybaeva Ál-Farabı atyndaǵy QazUÝ-niń Qazaqstan tarıhy kafedrasynyń dosenti

Erkenova A.K. Ál-Farabı atyndaǵy QazUÝ-niń shyǵystaný fakúltetiniń 1 kýrs stýdenti

---