InfoHub Logo

Máńgilik eldiń máńgilik nyshandary

Táýelsizdik...Máńgilik el...Ulan-ǵaıyr atyrap, mańǵaz dala, osy bir sheti men shegi ulasyp jatqan, qyranym kógimde qulashyn keń jazar baıtaq ólke... Tarıh dıirmenin aınaldyryp kórer bolsaq, azattyqtyń aq tańyn ańsap, qansha qan men ter tógildi, qanshama eńbek atqaryldy?! Qaıtpas qaısar halqym táýelsizdik jolynda aıanbaı kúresti.Qazaq halqy eldiń eldigin saqtap qalý maqsatynda máńgilikke umtyldy.Sonyń nátıjesinde ótken qıyn-qystaý kúnniń jeńisi men búgingi beıbit kúnniń belgisi dep Memlekettik rámizderimdi aıta alamyn.

Egemmendikke qol jetkizgen soń, Qazaqstan Respýblıkasynyń Memlekettik Týy men Eltańbasy aıshyqtaldy. Kógimizde máńgi jelbireıtin aspan tústes kók Týymyz-beıbit ómirdiń nyshany. Qalyqtaı ushqan qyran-erkindikti ańsaǵan qazaq eliniń sımvoly. Shuǵylasyn shashqan altyn kún men oıý-órnegi talaı belesti baǵyndyrǵan ómir órneginen kórinis berip turǵandaı. Qazaq eliniń dańqyn asqaqtatar, mártebesin kóterer kók Týymyz tórtkúl dúnıeniń tóinde jelbireýin qalaımyn. Eltańbada beınelengen elimizdiń bostandyǵyn aıqyndaıtyn altyn qanatty qos pyraq, bıiktikti kózdegen juldyz, molshylyqty tanytar altyn dán, birneshe ulttyń ortaq mekenine aınalǵan qazaq eliniń birligin beıneler bıik shańyraq-osynyń barlyǵy tuǵyrly Qazaqstannyń mártebesin asqaqtatady. Shyńyraqtyń oń jaǵy men sol jaǵynda qanatty tulpar ornalasqan. Tulpar – dala dúldili, jeńiske degen jasymas jigerdiń , qajymas qaırattyń, táýelsizdikke, bostandyqqa umtylǵan qulshynystyń beınesi, ushqyr armannyń, asyl murattyń, jaqsylyqqa qushtarlyqtyń keıpi. Atalǵan nyshandardyń úndestigin tanyp, úılesimin tabý asqan sheberlik pen tapqyrlyq dep bilemin. Máńgilik eldi ańsaǵan qazaq “atoılap” uran saldy. Ótken kúnde ata-babalarymyz “Alash” dep, el namysyn kóterip uran etse, búgingi tańda el erteńiniń júrek dúrsili “Meniń elim” dep soǵady. Sol bir dúrsildi seziný úshin alaqanymyzdyń júrek tusyna qoıylýy jáne Ánuranǵa degen erekshe qurmet ór namysty halyqtyń rýhyn odan ári kóterip, mahabbatyn oıatyp, el erteńi úshin jaýapkershilikti sezindiredi. Osy bir áýezdi áýen árqaısymyzdyń júrek lúpilimizdi arttyryp, patrıottyq sezimge bóleıtin ár qazaqtyń máńgilik boıtumary dep bilemin. Sebebi halyqtyń tarıhy, baılyǵy men erkindigi, ata-babalarymyzdyń ańsaǵan armany, talaı batyrlarymyz bilektiń kúshi, naızanyń ushymen qorǵaǵan, jan alysyp, jan berisip jetken asyl muraty, bári -bári osy ánuranymyzben shyrqalady.   Negizi nyq qalanǵan eldiń ketigin taýyp, kirpishi bolyp qalaný jolynda “gúli bolyp egilý, jyry bolyp tógilý”-bizdiń  maqsatymyz!

Ótken kúnniń negizgi maqsaty bolyp, búgingi tańda asyl muramyzǵa aınalǵan Memlekettik rámizderdi qurmetteý- bizdiń boryshymyz. Azattyqtyń aq tańy astynda san jeńistiń jemisi bolyp qóriner máńgilik nyshandary- myzdy kózdiń qarashyǵyndaı qorǵap, saqtaýymyz kerek. Tuǵyry bıik, táýelsizdigi berik Qazaqstannyń Týy kók aspanda jelbirep, Ánuran úni shartarapqa qalyqtaǵaı!

Ý.M.Djoldybaeva Ál-Farabı atyndaǵy QazUÝ-niń Qazaqstan tarıhy kafedrasynyń dosenti

Mádenıetova.B,Ál-Farabı atyndaǵy QazUÝ-niń shyǵystaný fakúltetiniń 1 kýrs stýdenti

---