InfoHub Logo

Mektep baǵdarlamasyna «Adaldyq álippesi» engizilýi múmkin. Bul týraly QR Sybaılas jemqorlyqqa qarsy is-qımyl agenttiginiń tóraǵasy Alık Shpekbaev aıtty.

«Parasattylyq ıdeologıasyn nasıhattaýda úzdiksiz keshendi bilim berý mańyzdy. Biz qazirgi tańda Bilim mınıstrligimen negizgi mektep pánderiniń baǵdarlamasyna parasattylyq ıdeologıasyn engizýdi pysyqtadyq. Osy rette «Egemen Qazaqstan» respýblıkalyq gazetiniń basqarma tóraǵasy, Agenttiktiń Qoǵamdyq keńesiniń múshesi Darhan Qydyráliniń «Adaldyq álippesin» ázirleý týraly bastamasy nazar aýdarýǵa turarlyq. «Tárbıe tal besikten bastalady» degendeı, bul qadam balalardy erte jastan adal ómir súrýge baýlýǵa yqpal etedi», — dedi Alık Shpekbaev agenttiktiń alqa otyrysynda.

Sonymen qatar ol azamattardy memlekettik organdardyń qyzmetine tartý ınstıtýttary men tetikterin nyǵaıtý mańyzdy mindet ekendigin basa aıtty.

«Agenttikte qoǵam ókilderi barlyq aparattyq keńesterge, kadrlyq jáne memlekettik satyp alý boıynsha komısıalarǵa qatysady, bul bizdiń qyzmetimizdiń ashyqtyǵy men aıqyndyǵynyń joǵary deńgeıin kórsetedi. Bul barlyq memlekettik apparatqa tán bolýy kerek. Memleket basshysy aıtqandaı, azamattar — bizdiń basty tutynýshylarymyz, sondyqtan biz qyzmetimizdi qoǵamnan jasyrmaýymyz kerek. Sonymen qatar, memlekettik mekemelerdiń tájirıbesine áleýmettik jelilerdi paıdalana otyryp, konkýrstyq kadr komısıalarynyń onlaın-translásıasyn engizý usynylady», — dedi ol.

---