InfoHub Logo

2021 jyldan bastap Qazaqstanda joǵary oqý oryndarynyń memlekettik úlgidegi emes jeke úlgidegi dıplom berýi týraly norma kúshine enedi. Bul jaıynda QR Bilim jáne ǵylym mınıstri Ashat Aımaǵambetov pedagogıkalyq joǵary oqý oryndarynyń stýdentterimen kezdesýinde aıtty.

Vedomstvo baspasóz qyzmetiniń málimetinshe, mınıstr jıynǵa qatysýshylardyń saýaldaryna jaýap berip, pedagogıkalyq joǵary oqý oryndarynyń stýdentterin mektepterge jumys isteýge shaqyrdy.

Kezdesý ashyq dıalog formatynda ótti. Kezdesý barysynda Ashat Aımaǵambetov bilim salasy úshin mańyzdylyǵy orasan zor eki qujattyń qabyldanǵanyn atap ótti. Olar - 2020-2025 jyldarǵa arnalǵan bilim men ǵylymdy damytýdyń jańa memlekettik baǵdarlamasy men «Pedagog mártebesi týraly» QR Zańy. Mınıstr pedagogıkalyq qyzmetkerlerdiń jumys jaǵdaıyn jaqsartý jáne barlyq deńgeıde bilim sapasyn arttyrýmen jańartylǵan bilim baǵdarlamasynyń artyqshylyqtary tóńireginde mınıstrlikpen atqarylyp jatqan jumystar týraly aıtyp berdi.

«QR «Pedagog mártebesi týraly« Zańy pedagogtyń materıaldyq qamtamasyz etilýine, kótermeleýge jáne áleýmettik kepildikterge qatysty quqyqtaryn qarastyrady. Pedagogtyń oqytý men tárbıeleýdiń avtorlyq ádisterin ázirleý jáne qoldaný, oqý quraldaryn tańdaý, aqparattyq resýrstardy tegin paıdalaný, biliktilikti arttyrý jáne taǵylymdamadan ótý nysandaryn tańdaý bóliginde kásiptik quqyqtary keńeıtiledi. Mektep muǵalimderiniń sapaly quramyn arttyrý úshin magıstr dárejesi bar tulǵalar úshin 10 AEK kóleminde qosymsha aqy qarastyrylǵan. Sonymen qatar, dápter tekserýmen synyp jetekshilik úshin 2 ese aqy, tálimgerlik pen pedagogıkalyq sheberlikke arnalǵan qosymsha aqylar kózdelgen», - dedi Ashat Aımaǵambetov.

Aıta ketken jón, pedagogıkalyq sheberliktiń biliktiligi úshin qosymsha aqy barlyq pedagogtar úshin laýazymdyq jalaqydan 30-dan 50 paıyzǵa deıingi mólsherde belgilenedi.

Mınıstr pedagogtardy ózine tán emes jumysqa tartýǵa tyıym salý jáne eseptilikti azaıtý týraly egjeı-tegjeıli aıtyp berdi.

Bilim jáne ǵylym mınıstrliginiń basshysy 2021 jyldan bastap joǵary oqý oryndarynyń memlekettik úlgidegi emes, jeke úlgidegi (áskerı jáne arnaıy oqý oryndaryn qospaǵanda) dıplom berýi týraly norma kúshine enetinin aıtty. Bul joǵary oqý oryndary arasyndaǵy básekelestikti arttyryp, usynylatyn bilim berý qyzmetteriniń sapasyna qatysty jaýapkershiliktiń ósýin qamtamasyz etpek. A.

Aımaǵambetovtiń aıtýynsha, endi jumys berýshiler dıplomǵa emes, túlektiń quzyretterine kóbirek kóńil bóledi. Jumysqa ornalastyrý kezinde joǵary oqý ornynyń bedeli men ımıji basty ról atqaratyn bolady.

«Stýdentter men olardyń ata-analaryn JOO tańdaýda muqıat bolýǵa shaqyramyz. Sonymen qatar, kelesi aspektilerge nazar aýdarýdy usyný qajet: álemniń úzdik joǵary oqý oryndary reıtıńinde JOO-nyń pozısıasy - QS jáne «Atameken« UKP reıtıńinde bilim berý baǵdarlamalary; JOO mártebesi men akademıalyq bedeli; usynylatyn bilim berý qyzmetteriniń sapasy», - dedi A. Aımaǵambetov.

---