InfoHub Logo

Pedagog mamandyqtaryna túsetin talapkerler úshin shekti bal bıyl taǵy joǵarylaıdy. Bul týraly Qazaqstan Respýblıkasynyń Bilim jáne ǵylym mınıstri Ashat Aımaǵambetov pedagogıkalyq joǵary oqý oryndarynyń stýdentterimen kezdesýi barysynda málim etti.

Kezdesýde Ashat Aımaǵambetov joǵarǵy oqý ornyna pedagog mamandyqtary boıynsha túsýde shekti bal joǵarylaıtyndyǵyn habarlady. Máselen, 2019 jyly pedagogıkalyq mamandyqtarǵa túsýge shekti bal 60 balǵa deıin ósken. Endigi kezekte 2020 jyly shekti mejeni 70 balǵa deıin kóterý josparlanýda.

«Búgingi tańda eń úzdik mektep túlekteriniń arasynda muǵalim mamandyǵy aıtarlyqtaı suranysqa ıe bolmaı otyr. Osy rette talapkerler tarapynan daıarlaýdyń pedagogıkalyq baǵyttary sırek tańdalyp jatady. Bilim berý granttaryn taǵaıyndaý konkýrsyna qatysý úshin ótinish bergen kezde talapkerler kóbinese pedagogıkalyq baǵyttardy úshinshi jáne tórtinshi qylyp kórsetedi», - dedi mınıstr.

Vedomstvo basshysynyń aıtýynsha, talapkerlerdi pedagogıkalyq mamandyqtarǵa tartý úshin ótken jyly QR BǴM-men birqatar naqty sharalar qabyldandy.

Budan bólek, mınıstr 2021 jyldan bastap joǵary oqý oryndarynyń memlekettik úlgidegi emes, jeke úlgidegi (áskerı jáne arnaıy oqý oryndaryn qospaǵanda) dıplom berýi týraly norma kúshine enetinin aıtty. Bul joǵary oqý oryndary arasyndaǵy básekelestikti arttyryp, usynylatyn bilim berý qyzmetteriniń sapasyna qatysty jaýapkershiliktiń ósýin qamtamasyz etpek.

«Endi jumys berýshiler dıplomǵa emes, túlektiń quzyretiligine kóbirek kóńil bóledi. Jumysqa ornalastyrý kezinde joǵary oqý ornynyń bedeli men ımıji basty ról atqarady. Stýdentter men ata-analardy joǵary oqý ornyn tańdaýda muqıat bolýǵa shaqyramyz», - dedi A. Aımaǵambetov.

---