InfoHub Logo

QR Ulttyq testileý ortalyǵynyń dırektory Rýslan Emelbaev 2023 jylǵy UBT-ǵa qandaı ózgerister engenin aıtyp berdi.

Bıyl da talapker UBT-ny bes ret tapsyra alady: qańtar, naýryz tamyz aılarynda aqyly negizde oqý úshin, mamyr-maýsym aılarynda ótetin negizgi UBT-ny eki ret tapsyryp, eń jaqsy nátıjemen grant konkýrsyna qatysa alady.

«UBT-2023 formatynda ózgerister joq. Alaıda, «Qazaqstan tarıhy» jáne «Oqý saýattylyǵy» pánderiniń tapsyrmalar sany ózgerdi. Osylaısha, Qazaqstan tarıhy – 20, oqý saýattylyǵy – 15, matematıkalyq saýattylyq – 15 jáne eki beıindik pán boıynsha 35 test suraǵy usynylady. Barlyǵy – 120 tapsyrma, eń joǵary upaı – 140. Testileýdiń jalpy ýaqyty 4 saǵat (240 mınýt) bolyp qalady. Sondaı-aq erekshe bilim berý qajettilikteri bar balalarǵa qosymsha 40 mınýt beriledi», - dedi Ulttyq testileý ortalyǵynyń dırektory Rýslan Emelbaev Ortalyq komýnıkasıalar qyzmetinde.

Sonymen qatar, jaýap nusqalarynyń sany azaıǵan. Bir durys jaýaby bar test tapsyrmalarynda nusqalar sany 5-ten 4-ke deıin, bir nemese birneshe durys jaýaby bar test tapsyrmalarynda nusqalar sany 8-den 6-ǵa deıin azaıǵan.

Eń basty jańalyqtardyń biri – 2023 jylǵy qańtardan bastap «Informatıka muǵalimderin daıarlaý», «Aqparattyq tehnologıalar», «Aqparattyq qaýipsizdik» bilim berý baǵdarlamalaryna túsýshiler UBT-ny «Matematıka-Informatıka» kombınasıasy boıynsha tapsyrady.

«Buǵan deıin IT salasyna túsýshiler «Matematıka-Fızıka» pánderin tańdaıtyn. Testileýge daıyndyqty jaqsartý úshin oqý jylynyń basynda ınformatıka boıynsha UBT-da kezdesetin termınder tizimin jarıaladyq. Qazaq tilinde tapsyrýshylar úshin termınderdiń oryssha jáne aǵylshynsha, orys tilinde tapsyrýshylarǵa – qazaqsha jáne aǵylshynsha, aǵylshynsha tapsyrýshylarǵa – qazaqsha-oryssha aýdarmasy usynylady. Sondaı-aq, barlyq talapkerlerge kompúter ekrandarynda kálkýlátor, Mendeleev jáne erigishtik kestesi qoljetimdi bolady. Testileý ortalyǵy kestelerdi qaǵaz túrinde de taratady, oqýshylardyń ózderine ákelýge ruqsat joq», - dep túsindirdi spıker.

UBT-ǵa daıyndyqty jaqsartý maqsatynda Ulttyq testileý ortalyǵy óz saıtynda jáne áleýmettik jelilerinde test josparyn, UBT-da kezdesetin Qazaqstan tarıhy men Dúnıejúzi tarıhynan 100 tarıhı datany, Informatıka páninen termınder tizimin, Qazaq ádebıeti jáne orys ádebıeti pánderinen suraqtar keletin shyǵarmalar tizimin jarıalady.

Aıta keteıik, qańtar aıyndaǵy UBT-ny 123 myń adam tapsyrdy. Testileý qorytyndysy boıynsha 102 myńǵa jýyq talapker shekti bal (50) jınady, bul qatysýshylardyń jalpy sanynyń 83%-yn quraıdy. Al 21 myńnan astamy (17%) shekti bal jınaı almady.

Jalpy UBT ortasha baly 76 baldy qurady. Eń joǵary bal – 139, oǵan Qazaqstan boıynsha 5 talapker qol jetkizgen.

Sondaı-aq, IELTS synaǵynan 5.5 jáne 5.0. upaı alǵan talapkerler aǵylshyn tilinen UBT tapsyrmaýy múmkin.

---