InfoHub Logo

2025 jylǵa deıin elimizde 800 jańa mektep salynady. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty.

«Kelesi mańyzdy baǵyt — ınfraqurylym. Boljamǵa súıensek, 2025 jylǵa qaraı oryn tapshylyǵy 500 myńǵa jýyq oryndy quraıdy. Bul tek qana mektepterde. Atalǵan problemalardy sheshý úshin mektepter memleket jáne jekemenshik tarapynan salynatyn bolady. Atap aıtqanda, 650 myńnan astam orynǵa 800 jańa mektepti memlekettik búdjet tarapynan jáne jeke ınvestısıa tartý arqyly salý josparlandy. Oǵan 876 mlrd teńge bólinedi. Nátıjesinde 3 aýysymdy mektepter men oryn tapshylyǵy sheshilip, apatty mektepterdiń sany azaıady», — dedi 2025 jylǵa deıin Qazaqstanda bilim men ǵylymdy damytýdyń memlekettik baǵdarlamasyn tanystyrǵan Ashat Aımaǵambetov.

Buǵan qosa, mınıstrdiń aıtýynsha, aýyl mektepterin qoldaý úshin «Aýyl — el besigi» baǵdarlamasymen baılanystyrylyp, aýyldaǵy tirek mektepter úshin 114 ınternat salýǵa 53 mlrd teńge bólý josparlanǵan.

«Búgingi kúni elimizde 1879 mektepte múldem sport zaly joq. Osyǵan oraı oqýshy sany 150-den asatyn barlyq mektepte sport zal salynady. Osy maqsatta 724 sport zalyn salýǵa 80 mlrd teńge bólindi. Jańa baǵdarlama aıasynda barlyq mektepterdi fızıka, hımıa, bıologıa pándik kabınettermen tolyq qamtamasyz etýge 100 mlrd teńge, pándik kabınetterdi kompúterlermen qamtýdy 100 paıyz jetkizý úshin 50 mlrd teńge taǵy bólinip otyr. Bul máselelerdiń jyldar boıy sheshilmeı kelgenin atap ótkim keledi jáne bul shyn máninde bilim salasy úshin óte úlken jaqsy jańalyq», — dedi ol.

---