InfoHub Logo

Bilim granty ortasha alǵanda 340-420 myńnan 900 myń teńgege deıin ósiriledi. Bul týraly búgin Úkimet otyrysynda QR Bilim jáne ǵylym mınıstri Ashat Aımaǵambetov aıtty.

«Jas maman» jobasy boıynsha 180 kolejdiń materıaldyq-tehnıkalyq bazasy jańartylady. Ol úshin búdjetten 58 mlrd teńge qarastyryldy. Tegin kásibı tehnıkalyq bilim baǵdarlamasymen jyl saıyn 100 myń stýdentti qamtıtyn bolamyz. Al dýaldy oqýmen qamtylǵan stýdentterdiń sany 35 paıyzǵa jetedi. Kolej stýdentterin jumysqa ornalastyrý kórsetkishi 60-tan 75 paıyzǵa deıin jetetin bolady. Joǵary bilim baǵdarlamalaryn kásibı standarttarǵa negizdep, 100 paıyz jańartý mindeti tur. Shetel stýdentteriniń sany jalpy kontıgenttiń 10 paıyzyn quraıtyn bolady. Bilim granttaryn ortasha alǵanda 340-420 myńnan 900 myń teńgege deıin ósirý arqyly profesorlyq-oqytýshylyq quramnyń eńbekaqysyn kóterý, ýnıversıtetterdiń materıaldyq bazasyn jaqsartý qarastyrylyp otyr. Bul kópten kútken jańalyq. Shyny kerek 2011 jyldan bastap grant quny jalpy ózgermegen. Osyǵan búdjetten 244 mln teńge qarastyryldy», — dedi 2025 jylǵa deıin Qazaqstanda bilim men ǵylymdy damytýdyń memlekettik baǵdarlamasyn tanystyrǵan Ashat Aımaǵambetov.

Onyń aıtýynsha, 10 ýnıversıtette akademıalyq basymdyq ortalyqtaryn qurý úshin 21 mlrd teńge bólinip, 10 ýnıversıtet álemniń úzdik 500 ýnıversıtetiniń qataryna kiretin bolady.

«Buǵan qosa UBT tapsyrý elektrondy formatqa kóshiriledi. Granttardyń birneshe túri engizilip, joǵary oqý ornynyń qoljetimdiligi, ashyqtyǵy qamtamasyz etildi. Sonymen qatar 2025 jylǵa deıin 90 myń orynǵa arnalǵan jataqhana alynady. Pedagogıka mamandaryn daıyndaıtyn ýnıversıtetter sany búgingi kúni — 85. Osy ýnıversıtetter boıynsha biz qosymsha talap qoıyp, onyń sanyn áldeqaıda azaıtyp, materıaldyq bazasyn nyǵaıtamyz. Bizge pedagogterdi daıyndaý óte mańyzdy másele», — dedi mınıstr.

---