InfoHub Logo

Ǵylym jáne joǵary bilim mınıstri Saıasat Nurbek 2037 jyldan bastap memleket joǵary bilim granttaryn toqtatyny týraly aqparattyń qate ekenin málim etti.

«Ol jalǵan emes, biraq durys emes aqparat. Ózderińizge málim, Prezıdent Joldaýynda mynandaı bir úlken tapsyrma berdi. Kelesi jyldan bastap «Keleshek» degen júıege kóshý kerek. Bul otbasylarǵa balasyna 5 jastan bastap aqyryndap aqsha jınaýǵa múmkindik beredi. Onyń ústine bizdiń memleketten syıaqy túsedi. Bul – joǵary bilimniń qoljetimdiligin saqtap qalý úshin josparlanǵan shara. 2037 jyldan bastap granttar toqtamaıdy. Biraq granttardyń sany azaıýy múmkin. Nege deseńiz, aqyryndap, bir 15-20 jylda aqsha jınaqtalady. Ár otbasy bir aılyq eseptik kórsetkish qazir 3460 teńge desek, sony aı saıyn osy shotqa salyp tursa, memleket tarapynan onyń ústine taǵy syıaqylardy qosady – jınaqtaýshy, saqtandyrýshy kompanıalardyń syıaqysy bar. Bala 17-18 jasqa jetkende 12,5 mln teńge jınalady. Qazir biz búkil esepti pysyqtap jatyrmyz. Iaǵnı, bala joǵary oqý ornyna túskende semáda kepildi túrde aqsha jınalyp qalady. Al bala grantqa túskende sol aqshany baspana alýǵa jumsaýǵa bolady», - dedi mınıstr.

Vedomstvo basshysy granttar sany birtindep azaıǵanymen, joǵary bilimge memlekettik tapsyrys toqtamaıtynyn eskertti.

«Bul bir kúnde ǵana bolmaıdy. 15-20 jyl boıy aqsha jınalǵanda granttardyń sany azaıýy múmkin. Grantqa degen memlekettik tapsyrys qalady. Bul –memleketimizdiń negizgi fýnksıasy. Joǵary bilimge qoljetimdilikti saqtap qalamyz. Ol jaǵynan eshqandaı ózgeris bolmaıdy. Biraq granttardyń sany ózgerýi múmkin, azaıýy múmkin», - dedi Saıasat Nurbek.

---