InfoHub Logo

Bıyl alǵash ret Muǵalimder kúni merekesi 5 qazanda merekelenedi. Tıisti qaýlyny QR Úkimeti bıyl 10 naýryzda qabyldaǵan bolatyn.

Memlekettik merekeler tizimine sáıkes, osy ýaqytqa deıin respýblıkada Muǵalimder kúni qazan aıynyń birinshi jeksenbisinde toılanyp keldi. Endi bul mereke 5 qazanda álemniń 100-den astam eli atap ótetin Dúnıejúzilik muǵalimder kúnimen sáıkestendirildi.

Muǵalimder kúnine arnalǵan úzdik quttyqtaýlar

Dúnıejúzilik muǵalimder kúnin bekitýge 1966 jyly 5 qazanda Parıjde ótken Muǵalimderdiń mártebesi týraly arnaıy úkimetaralyq konferensıa uıtqy boldy. Nátıjesinde IýNESKO men Halyqaralyq eńbek uıymynyń ókilderi «Muǵalimderdiń mártebesine qatysty usynystar» qujatyna qol qoıdy. Dúnıejúzilik muǵalimder kúni alǵash ret 1994 jyly 5 qazanda atap ótildi.

«Qadirli ustazdar! Sizderdi tól merekemiz – Muǵalimder kúnimen shyn júrekten quttyqtaımyn! Elimizdegi mıllıondaǵan jas óren ózderińizden taǵylymdy tárbıe, ónegeli bilim alyp, úlken ómir jolyna qadam basady. Sizderdiń qajyrly eńbekterińizdiń, shydamdylyqtaryńyz ben adaldyqtaryńyzdyń arqasynda keleshek urpaqtyń negizi qalyptasady. Tulǵa damýynyń bastaýynda turǵan, boıyndaǵy bilimin balalarǵa berip, olardy eńbeksúıgishtikke, adamgershilikke, eljandylyqqa, óz Otanyna degen súıispenshilikke baýlıtyn – sizdersizder. Qurmetti áriptester, bul mańyzdy da kúrmeýi qıyn joldaǵy sheshýshi ról sizderge ǵana tıesili», - dep quttyqtady QR Oqý-aǵartý mınıstri Ǵanı Beısembaev.

Mınıstrdiń aıtýynsha, elimizdiń úzdik muǵalimderi «Bilim berýdegi ózgeristiń 1000 kóshbasshysy» respýblıkalyq kadr rezervine qabyldana alady. Al eń myqtylary «Bolashaq» baǵdarlamasy boıynsha sheteldik taǵylymdamadan ótýge jiberiledi.

Mınıstrlik bilim salasynda 30 jáne odan da kóp jyl eńbek etken muǵalimderdi «Eńbek ardageri» medalimen marapattaý týraly sheshim qabyldady. Alǵash ret Respýblıkalyq pedagogıka qyzmetkerlerdiń ardagerler Keńesi quryldy. Mundaı keńester eldiń ár aımaǵynda qurylady.

Aıta keteıik, búginde Qazaqstannyń bilim berý salasynda 500 myńǵa jýyq mektepke deıingi, orta, tehnıkalyq jáne kásiptik bilim berý pedagogi jumys isteıdi.

Memleket basshysynyń qoldaýymen 2019 jyly mańyzdy máseleniń biri – pedagog mamandyǵyna erekshe mártebe berý jóninde sheshim qabyldandy.

Tórt jyl ishinde mektep muǵalimderiniń jalaqysy eki ese ósti. 2023 jyldyń 1 qańtarynan bastap muǵalimderdiń jalaqysy taǵy 25 paıyzǵa kóterildi. Búginde 220 myńdaı muǵalimge taǵaıyndalǵan sanattaryna qaraı 50 paıyzǵa deıin ústemaqy tólenip otyr.

Bıylǵy qyrkúıek aıynan bastap mektepke deıingi uıymdarda eńbek etetin 97 myń pedagogtiń jalaqysy taǵy 30 paıyzǵa ósti. Sonymen qatar, bıyl alǵash ret 90 myńnan astam pedagog biliktilikti arttyrý kýrstarynan ótti.

Sondaı-aq, búgin Astanada respýblıkalyq pedagogter sezi ótedi. Mundaı shara 2005 jyldan beri ótkizilmegen. Oǵan elimizdiń barlyq óńirinen 700-ge jýyq muǵalim qatysady. Pedagogter arnaıy uıymdastyrylǵan alańdarada ozyq eńbekterimen jáne halyqaralyq tájirıbelermen bólisedi.

Respýblıkalyq pedagogter sezinde orta bilim berý sapasyn arttyrýǵa erekshe kóńil bólinbek. Bilim berý sapasyn arttyrýdyń tujyrymdamalyq aspektileri plenarlyq otyrysta QR Oqý-aǵartý mınıstriniń «Bilim sapasy: jaı-kúıi jáne jetildirý joldary» baıandamasynda jarıalanady. Bul kúni elimizdiń úzdik pedagogterin marapattaý rásimi de ótkiziledi.