InfoHub Logo

Abaıdyń 150 jyldyǵyn Dúnıejúzilik kólemde atap ótip jatqan kúnderi, bir ǵajaıyp tús kórdim:

...Abaıdyń úıi eken deımin, kórgenim, birine biri qarama qarsy eki bólmesi bar. Bireýi — úlken, sol bólmede keń dastarhan jaıylyp, qonaq qamy jasalýda. Abaıdyń búkil urpaǵy osynda bas qosyp, bir dastarhannan dám tatpaq sıaqty. Bireýi dastarhan basynda otyr. Maldasyn quryp, basyn sál ǵana tómen ustap, dastarhanǵa qarap otyrǵan sıaqty. Ústindegi kıimderi qazaqy, Abaıdyń zamanyńdaǵydaı, jaǵasy tik tigilgen.

Osy bólmeden Abaıdyń anasy — Uljandy keziktirdim. Ol kisi meni tanymaıtyn sıaqty. Men janyna baryp:

— Apa, siz meni tanymaısyz. Biraq men de sizdiń bir balańyzbyn, — dep, qushaqtaımyn, ol kisi de únsiz qushaǵyna alyp jatyr eken deımin.

Osydan keıin qarsy bólmege kiremin, tór aldynda kóneleý bir qatar sandyqtar jınalypty. Nege ekenin bilmeımin, osy bólmeden burynyraq qaıtys bolyp ketken naǵashy abysynym Qalımany kórdim. Ol álgi sandyqtardy aqtaryp, bireýinen bir shaǵyn túıinshek taýyp, maǵan ákelip berip:

— Mynaý Abaıdan qalǵan bir ýys talqan eken, sen al, — deıdi.

...Qazir oılap qarasam, kózim jetip turmasa da, jaratýshy bir Allanyń bar ekenine senip te qalatyn sekildimin. Arýaqqa eshqashan kúmán keltirip kórmesem de, Allanyń bar ekenin qalaı bilemin dep, dal bolatynmyn. Iá, Alla da bar sıaqty. Ol shynymen kóńili qalap, uıǵarym jasasa, bereri de kóp eken, qalaı berýdiń jolyn da tabady eken. Sońǵy jyldary meniń soǵan kózim jetkendeı.

Abaıdan qalǵan bir ýys talqan talaı jerden alyp shyǵyp keledi, áli de solaı bolatyn shyǵar dep senemin...

---