InfoHub Logo

Serikbaıdyń sergeldeńge túsýi op-ońaı boldy. Birese otyrdy, birese turdy, tamaq ta sińbedi, uıqy da joq, oılanyp júr. Ol kúbirlep:

— Parta parta ǵoı, stol - stol ǵoı, telefon telefon ǵoı... — deıdi ózine ózi maquldatyp. Túgeldeı jumbaq.

Serikbaev osylardy qaıtalap aıtyp, endi olardyń bas basyna toqtaıdy. Sonda ǵana azdaǵan túsinik paıda bolady da, shytyrmanda ketedi.

— Mysaly partany alaıyq. Partanyń aty parta - aq bolsyn. Al onyń famılıasyn kim dep qoıamyz? Eger osy partanyń shyqqan tegin alsaq, aǵash emes pe? Onda onyń famılıasy "Aǵashbaev" bolmaı ma? Biraq, aǵash bolǵanda qaı aǵash? Qara aǵash pa, qaraǵaı ma, qaıyń álde terek pe? — dep Serikbaev osyǵan da qınaldy. — Olaı bolǵanda stoldyń da famılıasy "Aǵashbaev" emes pe? Onda partamen ekeýi shatasyp ketpeı me? Meıli bular solaı-aq bolsyn. Sonda telefonnyń famılıasy kim bolǵany?

Serikbaev osyǵan kelgende qatty qysyldy. Et jemeı-aq, sorpa ishpeı-aq terlep tur. Kúnniń sýyǵy da kár qylatyn emes. Buıryqtyń kúshtiligi qystan da qatty bolǵany da...

Mektep bolǵan soń onda bári bar. Balta, ketpen, oraq, balǵa taǵy basqa tolyp jatyr. Jomarttyń buıryǵy boıynsha osynyń báriniń atyn taýyp, famılıasyn qoıyp, ótken jyldyń ınventarlyq esebin berý kerek. Srok tyǵyz, bas-aıaǵy erteńgi saǵat 10.

Serikbaıǵa oraq, balǵa, ketpen, baltalardyń famılıasyn tabý ońaı bolyp tur. Óıtkeni olardyń báriniń shyqqan tegi bir, temir. Sondyqtan da olardyń báriniń attaryn bólek-bólek jazyp kelip, "Temirbaev" dep qoıa salǵysy bar. Biraq, álgi aıtqandardan telefonnyń famılıasyn tabý qıyn. Olar bir zattan emes, ár zattan quralǵan, onda aǵash ta, temir de, topyraq ta bar. Býdandasyp ketken zattar — ata tegin tabý jumbaq.

Serikbaevty sergeldeńge salǵan osylardyń ata tegi. Ol tolyp jatqan famılıalardy atap kórdi. Ásirese telefonǵa izdegen famılıasy qyzyq boldy. Telefonnyń tikeleı tegin tappaǵan soń "Pochtabaev" dep te baıqady, biraq ol oǵan unaǵan joq. Qazaq "symmen sóılesti" deıtin edi dep, "Symbaev" dep te kórdi, bu da qolaıly bolmady. Aqyrynda telefon degen qatynastyń bir túri ǵoı dep "Qatynasbaev" degisi de keldi, onan da túk shyqpady. Aqyrynda Serikbaev shalqasynan jatyp alyp, ózderiniń aýyldaǵy istegen ınventarlyq aktilerin kóz aldyna keltirdi.

Bulardyń aktileri jaman jazylǵan joq edi. Onda mektepte qansha parta, qansha stol, qansha balta, neshe balǵa, oryndyq, shkaf bar. Barlyq ınventar atalyp jazylǵan, ony rastap 5 adam komısıa qol qoıǵan, mór de basylǵan.

Áńgime tek bas býhgalter oılap shyǵarǵan formamen jazylmaǵan aktilerden shyqty. Jomarttyń jumyryǵyn túıip, stoldy sabalap aqyrǵanda formasyna sáıkes jazylmaǵany boldy. Serikbaev oǵan kóne qoımap edi: árip kemirgen búrokrat Jomart jumyryǵyn kóterdi de stoldy qoıyp-qoıyp qaldy. Syılar shyryldap kóterilip, loqsyp quıylyp tógilip jatyr, qalamdar pyryldap ushyp aspandap júr. Ol buıyryp tur: — Qalaı jazsań olaı jaz, onda meniń jumysym joq. Erteńgi saǵat 10-da osynda bolasyń. Akty meniń aldymda jatatyn bolsyn. Forma mynadaı: (sózbe sóz kóshirildi).

— Mine osy suraqtarǵa buljytpaı, tapjyltpaı turyp jaýap ber.

— Adam emes, eń arǵysy at emes, atan emes, qalaı bolady onda?

— Onda meniń jumysym joq.

— Aýyl alys, 40—50 kılometr. Qalaı men erteńgi saǵat 10 da...

— Onda meniń jumysym joq.

— Qol qoıatyn komısıalar da aýylda qaldy. Qalaı erteńgi saǵat 10 da...

— Onda meniń jumysym joq.

Aýdandyq oqý bólimindegi bas býhgalter Jomart osylaı buıyrdy da, mekteptiń býhgalteri Serikbaev osylaı jaýap qaıtardy. Áńgime osymen bitti.

---