InfoHub Logo

Kóktemde oqýshylardyń barlyǵy mektep janyna shybyq otyrǵyzǵan edi. Álibekterdiń muǵalimi Rabıǵa apaı artylyp qalǵan kóshetterden balalarǵa bir-birden bergen.

«Úılerińniń janyna egip, kútip-baptańdar. Jyl saıyn bir aǵashtan tikseńder, keıin ný orman bolady» degen soń, Álibek te egip qoıǵan. Kún saıyn sý quıady. Qozy-laqtardy mańaılatpaıdy. Qazir shybyǵynyń boıy alasa bolǵanymen, japyraq jaıyp, jaıqalyp tur.
Sabaqtan qaıtqan beti. Álibektiń janynan bir mashına zý etip óte shyqty. Qadyr aǵanyń mashınasy ǵoı.

«Osy bar bolǵyr-aq quıyndatady da júredi. Kósheniń shańyn basyna kótermese, bir jeri aýyra ma eken? Esik aldyna shyǵýdan qaldyq qoı, túge!» dep otyrady Álibektiń apasy. Taǵy da sol. Taqyr joldyń topyraǵyn aspanǵa kóterip barady.

Álibek buryshty aınalǵan. Qadyr aǵanyń mashınasy joldan shyǵyp, ońǵa burylyp ketti. Álibek ózi ekken aǵashtyń qısań etkenin baıqap qaldy. Eki ókpesin qolyna alyp, júgirip jetti. Tal shybyq bir jaǵyna jantaıa qulapty. Mashınanyń dóńgelegi bel ortasynan janshyp ketipti. Jyldam úıge kirip, dáke alyp shyqty. Shybyqty qaıtadan turǵyzyp, synǵan jerin tańyp qoıdy.

Eki-úsh kúnnen keıin aǵash qýrap, sola bastady. Kúnine neshe ret sý quıǵany da sep bolmady. Japyraqtary saýdyrap túsip qaldy. Álibek endi Qadyr aǵadan ósh alýdyń amalyn qarastyrdy.

Kesh túsip, aýyldaǵylar maldaryn jaılap boldy. Álibek apasynyń kózin ala berip, úıden shyǵyp ketti. Buqpantaılap Qadyr aǵanyń mashınasyna jaqyndady. Úıden alyp shyqqan úlken shegeni qaltasynan shyǵardy. Onyń ushyn mashınanyń dóńgelegine qadap, basyn jerge tirep qoıdy. Sosyn úıine qaıtyp keldi.

Tańerteń oıanǵanda apasy ashýlanyp júr eken:

— Bes shaqyrym jerge taǵy da jaıaý baratyn boldyq, — deıdi.

— Qaıda, apa?

— Qaıda bolýshy edi, jumysqa da.

— Mashınamen aparýshy edi ǵoı?

— Dóńgelegi tesilip qalypty.

Álibek úndemedi. Óziniń qandaı aǵattyq istegenin endi túsindi.

---