InfoHub Logo

      Tań  araılap ata sala, áli uıqynyń shyrmaýynda shyrmalǵan kózimdi asha almaı jatyp, ájemdi izdeıtinmin. Jan-jaǵymdy jaılap, baqylap alamyn da, ájemniń turyp ketkenin seze qoıyp, shyn ótirigi belgisiz  óz-ózimnen baqyryp jylaı jónelemin. Sondaǵy oıym, syrtta úı tirshiligin jasap bastaǵan ájemdi shaqyrý, ájem kelse meni kıindiretin, áıtpese ózimniń kıiner oıym joq edi. Osylaısha, aqkóńil ájemniń etegine oratylyp, sharýasyna kedergi bolyp júrýshi em.  Men turǵanda anam samaýryn qaınatyp, ájem  dorbaǵa salynǵan aıranyn aǵashqa ilip júretin. Orazamdy asha sala, ájem ekeýmiz qurt jasaýǵa kirisetinbiz. Maǵan bunyń bári qyzyq árıne. Qansha tyrysqanymmen dál ájemdeı qurtty daıyndaı almaı qoıǵanmyn. Bireýi sopaq bolyp qalsa, endi bireýiniń bas-aıaǵy birikpeı shashylyp qalatyn. Ájeme: «ájeý mynaý qalaı»- dep ótirik domalatqan  qurtymdy kórsetkende, «Bizdiń qyz pysyq bolady-aý shamasy, qarashy, qalaı qurt jasaıdy»- dep anama meni maqtaıtyn. Anam búkil bet-aýzyma ústime jaǵylǵan qatyqty kórip kúlimdep qoıatyn. Sodan keıin, men aǵammen birge aýyl balalaryna qosylyp  oınap ketemin de, ájem jańaǵy meniń búldirip ketken isimdi( qurtty) erinbeı qaıta jóndep júredi. Oıyn qýyp, ymyrt jabyla úıge biraq keletinmin.Sol kezdegi aýyl balalary, bizderge mektep aýlasyndaǵy oıyn alańy qyzyq qoı, sirá. Eshkimge eskertpeı sol jaqta júrgenimdi ájem seze me, qalaı, dereý sol jerge kelgeninde, meniń oıyn alańyndaǵy temirdiń basynda turǵanymdy kórip, baıbalam sala úıge tarta qýatyn. Ájem sol kezde seksenniń seńgirinde bolsa da, qaıratty edi-aý. Men ájemniń qyzy bolǵandyqtan, onsha urys estimeı, ájeme erkelep júrip qutylatynmyn,al aǵamdy qalaqaımen jónge salyp alatyny áli esimde.Sonda da, biz qoldy-aıaqqa turmaı tyǵyla júrip, oıyn ordasynan biraq shyǵatynbyz.

     Ájemniń meıirimine biz ǵana bólenbedik, búkil aýyl júgermekteri ájemdi jaqsy tanıtyn, qasynan shyqpaıtynbyz. Tandyrǵa nan jabatyn kún  bizge múldem qyzyq ári toı.Tandyrymyz qashanyń janyna qalanǵan. Tandyrǵa nan jaýyp turǵan ájem kósheden ótken árbir adamǵa nan ustatatyn edi. Bizdiń balalar nandy alyp bir kóshe aınalyp júrip taýysatyn da  bóten adamdaı qaıta keletin. Biz oǵan ishek silemiz qata kúletin edik. Túrlerine qaramaı ájemdi aldamaqshy. Ájem de jymıa: «mynaý kimniń balalary»-dep  bilmegen syńaı tanyta qaıta nan ustatatyn.

       Ájem ekemizdiń naǵyz áńgimemiz keshke bastalatyn. Mektep tabaldyryǵyn attamaı jatyp kóptegen ańyz áńgimelerdi osy ájemnen estıtinmin. «Altyn saqa» ertegisine, «Jardan qulatý» , «Kókek pen Zeınep» ańyzdaryna ájemniń arqasynda qanyq boldym. Jatyp alyp ájemniń taramysty saýsaqtarymen esep shyǵaratynbyz. Meniń mektep aldyndaǵy irgetasymdy ájem qalap berdi. Osyndaı erekshe kúnderden bir oqıǵa esimde qalyp ketipti. Ájemniń qasynda jatqan  kezim bolatyn. Túnde ájemniń  áńgimesin tyńdaı otyryp, bylaı dedim:

- Áje, sonda sizder túıe baqqansyzdar ma?

 - Baqtyq qoı. Ákemniń túıeleri kóp bolatyn. Qyz- kelinshekter jınalyp alyp, kezek otyryp saýatynbyz. Keıinirek, Ortadaǵy Jákem túıe baqty sol kezde, qalaı saýatynyn jeńgeme ózim úıretkenmin. Sodan...

- Áje, biz sıyr baǵamyz ǵoı.

-  Aý, ıá baǵamyz.

- Aıran jasaımyz ǵoı.

- Jasap júrmin ǵoı, botam.

-Áje, aıran isheıikshi

-Meıli.

Qarnymnyń ashqanyn osylaı aınaldyryp,  suraq qoıyp jetkizdim. Ájem aqyryn aıańdaı basyp, meni jetekteı as bólmesine alyp bardy. Dorbasyn ashty da, menen  sút ákelýimdi surady. Osylaı otyryp,  túnniń bir jarymynda otyryp aıran ishtik. Ájemniń aıranyn ishkenniń armany joq shyǵar. Ákemniń  turyp kelgenin  sezgen ájem ákeme: «seniń úıińe urlyqqa túsip, aıran iship otyrmyz»- dep  kúlip qoıady.

    Osylaısha, ájemniń arqasynda meniń balalyq shaǵymnyń álbomy qyzyq kúnderdiń betterine toly boldy. Ájemniń alaqanynda jamandyqtyń ne ekenin bilmeı óstim. Qazir es bilip eseıgenimmen, áli ájeme erkelep júremin. Buryn ájemniń  janynda kishkentaı qyz otyratyn  edi,  qazir, ájem meniń janymda kishkentaı bolyp otyrady. Úlken ómirge qadam basyp eresek atansam da, ájemniń janarynan áli sol balaǵa degen  meıirim, ystyq lebiz, mahabbat kóremin. Arman qýyp Almatyǵa kelgenimde ájemdi erekshe saǵyna berdim. Qasynda júrip, úırenip qalǵanym ǵoı. Demalys  bastala sala aýyldaǵy ájeme qustaı ushyp baramyn. Ár jolǵa shyǵarda, emtıhan  tapsyrar kezderde ájemniń aq batasyn alamyn. Ájeniń tárbıesinde ósken ár balanyń minezi bólek bolady-aý deımin, meniń ortamdaǵy ár adam ájemniń qyzy ekenimdi aıtpaı aq tanıdy. Ájemniń barynda,sol aınalaıyn ájemniń qoldaýymen men áli talaı belesterdi baǵyndyraryma kámil senemin.

Jumash Eńlik

---