InfoHub Logo

Abylaı han qazaqtyń hany bolǵan, bir Botaqan degendi tiri kórge salǵan. Qaıtyp úıine kelgen, qatynyna aıtty:

— Botaqandy kórge salyp keldim, — deıdi, — bu orta júzden bizge úkim buıyrmaǵan eken.

Qatyny aıtty:

— Shyǵaryńyz kórden.

Abylaı bir kisini jiberdi:

— Kórden shyqsyn! — dep.

Bul kisi Botaqanǵa aıtty:

— Shyqpaımyn! — deıdi.

Jibergen kisisi Abylaıǵa bardy:

— Shyqpaıdy kórden, — deıdi.

Abylaıdyń ózi keldi:

— Iininen tartyp shyq! — dep.

Kórden biri tartyp shyǵaraıyn dep jatqanda, júreginiń basynan tars etip jarylyp ketti. orta júz namystandy. orta júz namystanǵan soń, Abylaı aýyp ketti qashyp. Arǵyn, naıman bolyp Abylaıdy qýdy. Basy Qazybek bop qýdy, úsh kóshkenshe qýdy. Abylaıdyń qatyny aıtty:

— Abylaı han, dáneme bildińiz be?

— Ne bileıin?

— Bizdi qýdy Qazybek. Qazybektiń úsh oıy bar, — deıdi. — Qazybek meni alsa qaıter edi, áıtpese seniń basyńdy alsa qaıter edi, áıtpese asýly qara qazandy alsa qaıter edi?

Qara qazandy asýly tastap ketipti. Kótinen Qazybek kelipti, qazannyń qasyna kelip turypty, naızany shanyshty.

— A, jurt, — deıdi, — Abylaı tek jaratqan kisi emes. Úıden shyqqanda, úsh oıym bar edi: «Abylaıdyń basyn kessem, qaıtamyn!» degen oıym bar edi. «Bolmasa Abylaıdyń qatynyn alyp qaıtamyn» dep edim. «Bolmasa qara qazanyn alyp qaıtamyn» dep edim.

Qazandy aldy da qaıtty. Sol qazandy Qazybek ózi asty, onan soń Bekbolat asty, onan soń Tilenshi asty. Sonan soń Shama tóre, Abylaıdyń qalmaq qatynynyń balasy qara narǵa qaly kilem jaýyp:

— Babamnyń qazanyn men alamyn, — dep Tilenshige kelip tústi. Qazanyn Shama alypty.

---