InfoHub Logo

Mektepten kelgende ákem kúrk-kúrk jótelip, qabattap kórpe jamylyp, jatyr eken. Sheshem; "E, jasaǵan ıem, óziń saqtaı gór", dep kúbirlep qoıady. Maǵan qarap:

— Tula boıy órtenip tur, dáriger shaqyraıyn desem tyńdamaıdy, — dedi, — alysqa uzap ketpe, maldyń aldynan shyǵasyń.

Keshke maldy qoraǵa jaıǵap bolǵanymda, kórshimiz Qoshaly shal úıge kirip bara jatty. Kúndegi ádeti, keshki shaıymyzdy ala bergende jetedi. "Erindi bir jalap qoıyp, qalyńdyǵyma jóneldim", dep tún jarymyna deıin áńgimesin kóıitedi. "Erindi bir jalap qoıyp" — bul onyń sóziniń máteli.

Biraq, bul sapar Qoshekeń kóp bógele almady.

— Shanshýdy da aýrý dep, bir shólmek " aqańdy" alyp, eki júz gramdyq "qyrlaýbaımen" (stakanmen degeni) tartyp jiber de, jyly tósekke jata qal, terlep aıyǵyp ketesiń, — dep kúlip, "aqylyn" aıtty da, shyǵýmen boldy.

Erteńine sheshemniń: "Keshegi Qoshekeń aıtqandy aldyraıyn ba", degenin estip qaldym.

— Aldyrsań aldyrsaıshy, myna shanshýy túskir birese búıirden, birese jaýyrynnan túıiledi, keter emes, ýf, — dep ákem basyn kógerdi.

Sheshem bergen kókala bes somdyqty qolǵa qysyp, aýyl dúkenine jóneldim. Esinep qoıyp, shybyn qaǵyp otyrǵan dúkenshi apaıǵa aqshany ustatyp:

— Bir shólmek araq bersin dedi...

— Áı kim bersin dedi.

— Balam.

— Seniń ákeń araq ishetin be edi-eı, úıińe qonaq keldi me?

— Iá, deı salyp, usynǵan araǵyn qylǵyndyra ustap, shapqylap úıge tarttym.

Erteńine mektepten kelsem, ákem terlep shaı soraptap otyr eken. Qalampyr qatqan shaı ıisi muryn jarady. Ákem irgege qolyn sozyp, keshegi araqty sýyryp aldy.

— Balam, shaıǵa otyrmas buryn myna bir shólmekti meniń bastyǵyma aparyp bere sal, ishkisi kep jutynyp otyrǵan shyǵar, — dedi.

— Araphanǵa ma?

— Iá, kontorda otyr.

— Al ózińiz...

— Joq, balam! Ómirde aýzyma almaǵan edim. Aýrýdan jazylasyń degenge ... ishpeı-aq qoıdym. Úıde de turmasyn, aparyp ber.

Men ózime kesheden beri "jumys" bolǵan bir shólmek araqty ákemniń bastyǵy, murny qolaqpandaı ázirbaıjanǵa ala jóneldim.

... Qazir oılasam ákem sol kezde qyryqtyń shamasynda eken. Al, men she... Keshir, áke!..

---