InfoHub Logo

Bul oqıǵany mektepte muǵalim bolyp qyzmet isteıtin bir tanysym aıtqan edi. Al, tyńdańyz...

"Synyqtan basqanyń bári juǵady" degendeı, ásirese, on tort-on bes jastaǵy jasóspirimder eliktegish keledi. Teledıdardan, kósheden kórgenin isteıdi. Baıqaısyz ba, sońǵy kezderi taldyrmash qyz balalar qarnyn jarqyratyp, kindigin kórsetip júrýdi shyǵardy. Kórgende óziń uıalasyń. Men jetekshilik etetin toǵyzynshy synypta da sondaı bir oqýshyny baıqap qaldym. Ásire qyzyl juqqysh keledi, birinen biri kórip erteń synyp jarqyraǵan qaryn men kindikke tolyp ketpese neǵylsyn, munyń aldyn almasa bolmas degen oımen álgi kindigin jalańashtap kelgen oqýshynyń ortaǵa shyǵaryp eskertý jasadym:

— Indıra Qamzaeva, myna synyptastaryńnyń aldynda saǵan eskertemin, erteńnen bastap kindikti jalańashtap kelýdi qoıatyn bol, oqýshyǵa laıyq, myna ózińdeı qyzdar kıip júrgen kıimmen keletin bol, uqtyń ba? — dedim.

Indıra tómen qarap, basyn ızegendeı boldy. Endi túsingen bolar, kóptiń kózinshe balanyń saǵyn syndyrmaıyn degen oımen ornyna otyrǵyzdym.

Erteńine bul synypta sabaǵym joq-ty, sondyqtan asyqpaı sabaq bitetin kezde mektepke keldim. Bir kezde kózim túsip ketti... Indıra... sol baıaǵy qalpy, eshteńeden qapersiz, kúlip-oınap júr. Mundaı renjimespin, shaqyryp alyp, urystym da, erteń sabaqqa ata-anasyz kelmeýin eskerttim. Erteńine Indıra sabaqqa kelmedi. Sabaq bitip, oqýshylar taraǵannan keıin, muny mektep dırektoryna málimdegen jón shyǵar degen oımen kidiristep qaldym. Ornymnan qozǵala bergenim sol edi esik ashylyp, Indıra kórindi. Áli sol baıaǵy, kindigi kóringen qalpy. Mundaı ashýlanbaspyn, qalshyldap kettim. Sodan mektep oqýshysynyń etıkasy men estetıkasynan bastap sóz tıegin aǵyttym-aı kep, myna kıim kıisiniń oqýshyǵa laıyqsyz ekenin, al qazaq qyzdaryna tipti de jaraspaıtynyn uqtyryp-aq baqtym.

— Adamda uıat, ıba degen bolýy kerek ǵoı, nege aıtqandy tyńdamaısyń, keshe saǵan ata-anańnyń biri mektepke kelsin degenim qaıda? — dedim.

Sonda ǵana baıqadym onyń syrt jaǵynan bireý qozǵalaqtaǵandaı boldy. Indıradan edáýir eresekteý, shashyn qyzyl túske boıaǵan, shalbarlanyp, qarnyn jaltyratqan taǵy bir qyz tur, kindigine monshaq taǵyp alypty. "Toqal eshki múıiz suraımyn dep, qulaǵynan aıyrylypty" degen eken, endigi jetpegeni osy edi? Bul ne de bolsa qurbysy boldy ǵoı, bir-birinen aınymaýyn bulardyń, degen oı keldi.

— Ata-anańnyń biri erteńnen qalmaı mektepke keletin bolsyn, bul sońǵy eskertý, eger kelmese sabaqqa jiberilmeısiń, — dedim Indıraǵa qarap, ár sózimdi ejiktep jetkizdim.

— Aǵaı, anam keldi ǵoı, — dedi ol.

— Qashan keldi, qaıda ol?

Indıra janynda turǵan ózi sıaqty "qyzdy" kórsetti. Ne aıtarymdy bilmeı oryndyqqa sylq etip, otyra ketippin...

Bala kórgenin isteıdi degen osy-aý..

---