InfoHub Logo

Ál-Farabı atyndaǵy QazUÝ-niń profesory T.H. Ǵabıtovtyń shyǵarmashylyǵyn taldaý maqsatynda, 2-shi kýrs "Mádenıettaný" mamandyǵynyń stýdentteri  "Ulaǵatty ustaz" atty talqylaý sharasyn ótkizdi. Shara barysynda stýdentter profesor T.H. Ǵabıtovtyń eńbekterin talqylap, profesor ómirbaıanymen tanysyp shyqty. 

T.H. Ǵabıtov ál-Farabı atyndaǵy Qazaq ulttyq ýnıversıtetiniń profesory, fılosofıa ǵylymynyń doktory, QR ǴA akademıgi, mádenıettaný profesory, Qazaqstan Fılosofıalyq Kongresiniń vıse-prezıdenti. Tursyn Hafızuly Qazaqstannyń joǵary bilimi men ǵylym salasyna sińirgen eńbegi úshin 2009 jyly «Qurmet» ordenimen marapattaldy. Ǵalym «Joǵary oqý ornynyń úzdik oqytýshysy» memlekettik grantynyń (2007 j.), Qazaqstannyń bilim men ǵylym salasyna qosqan kórnekti úlesi úshin memlekettik ǵylymı stıpendıasynyń ıegeri, Qazaqstan Respýblıkasy joǵary oqý oryndary qaýymdastyǵynyń «Úzdik avtor» baıqaýynyń, «Qazaqstan ǵalymdary odaǵynyń» respýblıkanyń ǵylym, tehnıka jáne bilim salasyn damytýǵa qosqan zor úlesi úshin baıqaýynyń laýreaty. Tursyn Ǵabıtovtyń «Mádenıettaný» oqýlyǵy 2001 jyly ótken QR Mádenıet jáne aqparat mınıstrliginiń baıqaýynda «Qazaqstan on jyldyǵynyń úzdik kitaby», 2006 jyly «Uly Jibek joly» halyqaralyq kitap jármeńkesiniń laýreaty atandy. QR joǵarǵy oqý oryndary qaýymdastyǵynyń sheshimimen avtordyń oqýlyqtary Qazaqstannyń eń tanymal oqýlyqtarynyń qataryna engen bolatyn. Tursyn Ǵabıtovtyń esimi qazaqstandyq mádenıettanýshylar mektebiniń negizin qalaýshylardyń biri retinde shetelde de tanymal. Ǵalym kóptegen halyqaralyq kongresterdiń, sımpozıýmdardyń, konferensıalardyń jumysyna belsene qatysyp, mazmundy baıandamalar jasady. Ǵalym 200-den astam ǵylymı kitaptyń, onyń ishinde 50-den astam jeke jáne ujymdyq monografıalardyń, kóptegen oqýlyqtar men oqý quraldarynyń, ensıklopedıalardyń, sózdikterdiń, jalpy sany 600-den asatyn jarıalanymdardyń avtory. Avtordyń fılosofıa jáne etıka tarıhy boıynsha eńbekteri Aýǵanstan, Iran, Ázirbaıjan jáne Túrkıada jaryq kórdi. Profesordyń ǵylymı jetekshiligimen 40-tan astam ǵylym kandıdaty men 6 ǵylym doktory, 5 Fılosofıa doktory (PhD) daıyndaldy. Tursyn Ǵabıtov «Ulttyq ıdeıa ‒ Qazaqstannyń 2007-2009 jyldarǵa arnalǵan turaqty damýynyń negizi» memlekettik baǵdarlamasyn iske asyrýǵa atsalysty, Qazaqstan Respýblıkasy Bilim jáne ǵylym mınıstrliginiń irgeli zertteýlerdi granttyq qarjylandyrýy aıasynda «Shyǵys pen Batys mádenıetteriniń dıalogy kontekstindegi Qazaqstandyq ulttyq ıdeıa» jobasynyń jetekshisi boldy. Profesor Tursyn Ǵabıtov «Mádenı mura» memlekettik baǵdarlamasyn júzege asyrý isine belsendi qatysyp, «Álemdik fılosofıalyq mura» jáne «Qazaq halqynyń fılosofıalyq murasy» seksıalarynyń múshesi, kóptomdyq avtorlarynyń, ǵylymı redaktorlarynyń biri retinde 40 tomnan turatyn danalyq jaýharlarynyń qazaq tilinde jaryq kórýine, jınaqtalýyna zor úles qosty.

Ǵalymnyń qatysýymen batys oıshyldary, Djon Lokk, Sharl Monteske, Jan-Jak Rýsso, Karl Popperdiń shyǵarmalary men fılosofıa tarıhshylary Djovannı Reale men Darıo Antıserıdiń eńbekteri qazaq tiline aýdaryldy.

Tursyn Ǵabıtovtyń «Mádenıettaný», «Fılosofıa», «Etıka» atty oqýlyqtary, «Qazaq mádenıetiniń tıpologıasy», «Qazaq fılosofıasynyń tarıhy», «Qazaq mádenıetiniń tarıhy men teorıasy» monografıalary respýblıkamyzda keńinen tanymal. Tursyn Ǵabıtovtyń «Qazaq fılosofıasy» jáne «Qazaq mádenıetiniń teorıasy men tarıhy» eńbekteri mádenı fılosofıalyq klasıkaǵa aınalǵan.

Dintaný jáne mádenıettaný kafedrasynyń aǵa oqytýshysy - Alıkbaeva Marjan

"Mádenıettaný" mamandyǵynyń 1 kýrs magıstranty - Satybaldına Arýjan

---