InfoHub Logo

Sonaý baǵzy zamandarda qys qazirgiden de sýyq, qazirgiden de qaharly bolypty. Bir ǵajaby, ol kezde qar jaýmaǵan eken. Jerdiń beti aq kórpege oranbaı, qap-qara kúıinde qatyp-semip jatypty. Qabaǵy qatýly Qys bolsa, óziniń saraıynyń terezesinen tómendegi múlgigen tynyshtyqty únsiz baqylap, toń bop qatqan taqyr jerge uzaq qaraıdy eken.

Qystyń Qar degen jalǵyz uly bolypty. Ol óte sezimtal ári meıirimdi eken. Birde Kúz mezgili kezegin Qysqa berip, kún endi sýyta bastaǵan shaqta Qar balaqaı tómenge kóz jiberip, jyltyrap jatqan áldebir ottardy kóredi. «Bul neǵylǵan ot?» dep oılaıdy Qar. Jaqyn baryp kórgisi keledi. Sóıtip, jerge túsedi. Qasyna baryp qarasa, ot degeni alqyzyl gúlder eken.

— Netken ádemisińder! — deıdi Qar olarǵa tamsanyp.

Gúlder bolsa, bastaryn tómen salbyratypty.

— Biz ábden tońdyq. Qara sýyq ón boıymyzdan ótip barady. Kóp uzamaı múldem úsip qalamyz, — deıdi olar muńaıyp.

— Qandaı ókinishti! Nege bir jerge jasyrynyp qalmaısyńdar? — deıdi Qar.

— Biz júre almaımyz ǵoı! Tamyrymyz jerdiń astynda. Átteń, qalyń kórpemiz bolsa… Sony jamylyp jatyp, sýyqtan saqtanar edik, — deıdi gúlder.

Qar olardy qatty aıap ketedi. Saraıyna oralǵan soń, anasyna bolǵan oqıǵany baıandap beredi.

— Balam-aý, qaıdaǵy bir gúlderge janyń ashyǵany qalaı? Jer betinde gúl degen kóp! Biri solsa, ekinshisi ónip shyǵady, — deıdi. Artynan qabaǵyn túıip, qaharyna minip:

— Aıtpaqshy, sen ol gúlderdi qaıdan kórdiń? Erteń-aq úsitip, muz súńgige aınaldyraıyn! — deıdi.

Muny estigende meıirimdi Qar balanyń kóńili bosap, kózine móltildegen jas kelipti. Ol saraıdyń aldyna otyryp alyp, aǵyl-tegil jylaıdy. Kózinen aqqan árbir tamshy jas kip-kishkentaı qarshaǵa aınalady.

Sodan beri qysta aspannan qylaýlap aq ulpa jaýady eken. Adamdar ony qaharly Qystyń meıirimdi balasynyń qurmetine «qar» dep atap ketipti. Japalaqtap jaýǵan qar jerdiń betin jaýyp, qalyń kórpege aınalady eken. Náp-názik dala gúlderi sol kórpeniń astynda jatyp, qystan aman shyǵatyn bolypty.

Erte kóktemde súr qardyń astynan qyltıyp shyǵatyn báısheshektiń basy nege ıilip turatynyn bilesińder me? Bul onyń gúl bitkendi ajaldan qutqarǵan Qar balaǵa alǵys aıtqany eken.

Orys tilinen aýdarǵan Baǵdat Májıtov

---