InfoHub Logo

Ertede ańdardyń quıryǵy bolmapty. Tek ań patshasy arystannyń ǵana quıryǵy bar eken.

Ańdarǵa quıryqsyz ómir súrý, árıne, ońaı emes edi. Qysta birdeńe qylyp kúnderin kórgenimen, jazda sona men masaǵa talanyp, qatty qınalypty. Arqalaryna qonǵan qansorǵysh jándikterdi qaǵyp jiberetin quıryqtary bolmaǵandyqtan, beıshara ańdar kirerge tesik tappaı qalady eken.

Kúnderdiń bir kúni ańdardyń zary arystanǵa jetedi.

«Qoı, men bularǵa kómekteseıin» dep oılaıdy arystan. Sóıtip, ańdarǵa quıryq jasatady. Quıryqtar daıyn bolǵanda jan-jaqqa habar jiberedi, ańdardy saraıǵa jınaıdy.

Birinshi bolyp arystannyń aldyna túlki keledi.

— Bárekeldi! Sen bárinen buryn keldiń. Qalaǵan quıryǵyńdy al, — deıdi oǵan ań patshasy.

Túlkige keregi de sol edi. Ol ózine eń ádemi quıryqty tańdap alady. Odan keıin sekeńdep saraıǵa tıin de jetedi. Oǵan da áp-ádemi, úlpildep turǵan uzyn quıryq buıyrady. Jylqy kelip tógilip turǵan jal-quıryqty tańdaıdy. Osylaısha, barlyq ań qalaǵan quıryqqa ıe bolyp, arystanǵa alǵys aıtady.

Tek aıý ǵana saraıǵa kelýge asyqpaǵan eken. Ol «ańdar quıryq alyp jatyr» degen habardy estise de, tátti uıqysyn qımaı, apanynda jata beripti.

Arada qansha ýaqyt ótkenin kim bilsin, bir kúni aıý arystannyń aldyna barady.

— Men quıryǵymdy alýǵa keldim! Aıý degen atyma saı bireýin qaldyryp qoıǵan shyǵarsyz? — deıdi arystanǵa.

— Kesh qaldyń! Quıryqtyń bárin ańdar talap áketti, — deıdi arystan oǵan.

Aıýdyń birden unjyrǵasy túsip ketedi. Basyn salbyratyp, ilbip basyp ormanda kele jatsa, aldynan borsyq shyǵady. Qarasa, borsyqtyń áp-ádemi, up-uzyn quıryǵy bar eken.

— Áı, andaǵy quıryq saǵan laıyq emes qoı! Qaıtesiń, mundaı uzyn quıryqty! Odan da maǵan syılaı salsańshy. Ornyna bal bereıin, — deıdi aıý.

— Bere almaımyn! Balǵa bola quıryqsyz qalatyn jaıym joq, — deıdi borsyq.

— Ber, qane! Áıtpese, tartyp alamyn! — deıdi aıý. Sóıtedi de, borsyqty bas salmaq bolady. Borsyq tura qashady. Biraq quıryǵynyń ushy aıýdyń tyrnaǵyna ilinip qalady. Aıý ony quıryq etip, artyna jalǵap alypty.

Záresi ushqan borsyq bir jerge kelgende demin alyp, dereý jerdi tyrmalaýǵa kirisedi. Muny sol mańda júrgen túlki baıqap qalyp:

— Borsyq, saǵan ne bolǵan? Jerdi sonsha tyrmalaǵanyń ne? — dep suraıdy.

— Aıýdan qashyp kelemin. Ol quıryǵymdy tartyp almaq boldy. Jerdi qazyp tyǵylmasam, basqa amal joq, — deıdi borsyq.

— Oıbaı, onda men de tyǵylaıyn! — dep túlki de jerdi qazýǵa kirisedi.

Borsyq pen túlki jerdi ábden úńgip qazyp, ishine jasyrynyp qalady. Arttaryn qýyp kelgen aıý olardy taba almaı, aqyry apanyna qaıtady.

Sodan beri túlki men borsyq inde turady eken. Al aıý sol kúıi quıryqsyz qalypty.

Orys tilinen aýdarǵan Baǵdat Májıtov

---