InfoHub Logo

Ýa dostar! Joǵarǵy sózderden Alla taǵalanyń barlyǵyn hám birligin bildińiz, endi sıpattaryn aıtaıyn.

Alla taǵala bar, ózdiginen bar, bireý bar qylǵan emes, barlyǵynyń aldy joq, burynnan bar, arty da joq eshqashan joq bolmaıdy, ólmeıdi, tozbaıdy, ózgermeıdi. Alla taǵala jalǵyz, ne serigi joq, ne teńdesi, uqsasy joq jáne esh nársege uqsamaıdy. Kitapta búl alty sıpatyn — zatıa sıpaty deıdi. Olar mynaý: bar, ózdiginen bar, burynnan bar, joq bolmaıdy, jalǵyz, esh nársege uqsamaıdy. Bulardan basqa kitapta sýbýtıa degen segiz sıpaty bar. Olar mynaý: tiri, bilimdi, qudiretti, talap qylýshy, ıaǵnı bir nárseniń bolǵanyn unatýshy, bolǵyzýshy, ıaǵnı bar qylsa da, joq qylsa da sóıleýshi, estýshi, kórýshi. Biraq bul sıpattary adamdarǵa uqsamaıdy. Máselen, bizdiń tirshiligimizdegideı denemenen emes, bizdiń qudiretimizdeı qol-aıaq ıakı qarýmen emes, bizdiń bilimimizdeı oımenen, kózbenen, ıakı bireýden uǵyp emes. Aqyry óziniń esh nársege uqsamaǵany syqyldy sıpattary da ózgeniń sıpatyna uqsamaıdy. Jáne kitapta sálbıa sıpattary degen bolady. Olar: uıyqtamaıdy, ózgermeıdi degen syqyldylar. Ony eshbir kemshiligi joq dese sodan uǵýǵa bolady. Aqyrynda bárin jıyp aıtqanda, Alla taǵalanyń sıpattary kemshiliksiz, bilimdi, qudiret dese uǵarsyz.

---