InfoHub Logo

Búgin Almaty qalalyq Máslıhatynyń 50-shi sesıasynda depýtattar memlekettik balabaqshaǵa baratyn bir bala úshin tólenetin aqy qunyn 15 myń teńgeden asyrmaý jóninde qaýly qabyldady. Bul týraly Almaty qalasy ákiminiń baspasóz qyzmetinen habarlady.

Eske sala ketelik, «Nur Otan» partıasynyń Almaty qalalyq fılıalynyń depýtattar fraksıasy 2016 jyldyń 22-shi qańtarynda qaladaǵy memlekettik bala baqshalardy sharýashylyq esepten memlekettik tapsyrysqa kóshirý týraly bastama kótergen bolatyn. Osylaısha, bıylǵy jyldyń 1-shi aqpanynan bastap, eki jastan bes jasqa deıingi aralyqta memlekettik balabaqshaǵa baratyn 17 000 búldirshin úshin tek tamaqtaný quny ǵana tólenetin bolady. Bul úshin jergilikti búdjetten ótken jyldyń qorytyndysy boıynsha únemdelgen qarjydan 3 mlrd. teńgege jýyq qarjy bólinetin boldy.

«Bizde turmysy tómen jandardyń problemalaryn sheshý múmkindikteri bar. Sondyqtan, búgin balabaqshalar qunyn ósirýdiń ornyna biz 17 myń búldirshin úshin tólenetin balabaqsha qunyn tómendetip otyrmyz, osynyń arqasynda árbir otbasy 20 myń teńge kóleminde qarjysyn únemdeıtin bolady», - dedi sesıa barysynda Almaty ákim Baýyrjan Baıbek.

Budan ózge, memlekettik balabaqshada jumys isteıtin ári 48 myń teńge kóleminde ortasha jalaqy alatyn 3 360 tárbıeshige 30 paıyz qosymsha aqy tólenetin bolady. Bul sharalardyń barlyǵy QR Prezıdenti N.Nazarbaevtyń bıylǵy Joldaýynda áleýmettik az qorǵalǵan jandarǵa qoldaý kórsetý týraly aıtqan tapsyrmasy aıasynda júzege asyp otyr.

Sonymen qatar, búdjettik komısıa 2015 jyly únemdelgen qarjy esebinen birqatar áleýmettik mańyzy bar sharalar úshin 5,3 mlrd.teńge bólýdi qarastyrdy. Bul jerde ótken jyldyń Almaty qalasy úshin 18 mlrd. teńge ósimmen aıaqtalǵandyǵyn aıta ketken jón.  
«Áleýmettik az qorǵalǵan jandar úshin áleýmettik nan qunynyń ósýine qatysty 59 mln. teńge kóleminde qarjy bólinip otyr, azamattardyń osy kategorıasynyń kólik dotasıasy da qarastyrylǵan, ıaǵnı almatylyq jolaýshy tasymaldaýshylar úshin 2 mlrd.teńge kóleminde qarjy bólinetin bolady. Osylaısha, 2016 jyldyń 1-shi naýryzynan bastap 4,5 myń múgedek bala, 23 myń 1-2-shi toptaǵy múgedek, kózi nashar kóretin jandar, 12 myń Uly Otan soǵysynyń ardageri men solarǵa teńestirilgen ardagerler, 50 paıyz jeńildik alatyn 18 jasqa deıingi 4 jáne odan da kóp balalary bar analar qoǵamdyq kólikte tegin júretin bolady. Al, 202 myń oqýshyǵa baǵasy - 1000 teńgelik, 200 myń zeınetker men 7,5 myń kóp balaly analar úshin quny - 2000 teńgelik, al 202 myń stýdent úshin baǵasy - 3000 myń teńgelik bir aılyq jol júrý bıletteri qaıtadan qoldanysqa shyǵarylady», - dedi óz kezeginde Ekonomıka jáne búdjettik josparlaý basqarmasynyń basshysy Maqsat Qıqymov.

Jeńildetilgen jol aqysy bıletterin alý úshin atalǵan kategorıadaǵy azamattar qala aýdandary ákimdikteriniń áleýmettik qorǵaý bólimderine baryp, ótinishterin berýi tıis.

Sonymen qatar, Almaty qalasynyń 2020 jylǵa deıingi damý Baǵdarlamasyna sáıkes, azamattardyń ótinishteri boıynsha qalanyń keıbir bólikterindegi kólik beketteri joq ekendigi jónindegi másele de sheshimin tabatyn boldy. Olardyń jobalaý-smetalyq qujattamasyn daıyndaý úshin búdjetten 600 myń teńge qarastyryldy. Atalǵan Baǵdarlama aıasynda Almatynyń kólik modelin jasaý da qolǵa alynady, munda jol qozǵalysynyń keshendi shemasy, kólik legin tıimdi paıdalaný jáne basqa da jol-kólik júıesine qatysty mańyzdy máseleler qarastyrylǵan.

Osyǵan oraı, atalǵan shemany jasaý úshin 300 mln.teńge bólinedi. 
Sondaı-aq, májilis barysynda Gagarın atyndaǵy balalar kitaphanasyna kúrdeli jóndeý júrgizý úshin 28 mln. 737 myń teńge, «Samal» pansıonatyn jóndeýge 6 mln. 471 myń teńge jáne eki bala baqshaǵa jeńil qural-jabdyq, jıhaz, ydys-aıaq jáne basqa da kerek-jaraqtar alý úshin 11 mln. 688 myń teńge bólinetin boldy.

---