InfoHub Logo

Búgin Almatyda ótip jatqan dástúrli tamyz keńesinde qalalyq Bilim berý basqarmasynyń basshysy Rahat Shımasheva ata-analardan aqsha jınamaýdy eskertti.

Basqarma osyndaı  mátindegi hatty jyl saıyn barlyq mektepterge jiberedi.

«Qurmetti, áriptester. Qaıtalap aıtamyn. Sizderge aqsha jınaýǵa eshqandaı negiz joq. Eger, mundaı aqparat paıda bolsa, shara qoldanamyz», - dedi R. Shımasheva.

Onyń aıtýynsha, mektepter kerisinshe, ata-analarǵa mektepke bólingen búdjettik qarjynyń qaıda, qalaı jumsalyp jatqany týraly esep berýi tıis.

«Ákimniń tapsyrýymen birinshi basshylar mektep búdjetiniń kirisi men shyǵysy týraly esep berýi kerek. Sońǵy úsh jylda senim telefonyn ashqaly beri mektepterdegi aqsha jınaý týraly shaǵymdar 3 esege azaıdy», - dedi ol.

Qala ákimi Baýyrjan Baıbek óziniń baıandamasynda bıyl bilim berý salasyna qansha qarjy bólingenin aıtyp ótti.

«Bıyl bilim berý salasyna jańa nysandardyń qurylysyn qospaǵanda 63,4 mlrd teńge qarastyrylǵan. Al jańa nysan qurylysyn qosa alǵanda jalpy 86 mlrd teńge jumsaldy. Bul jalpy qala búdjetiniń 1/5 bóligine parapar. Mektepterdi jabdyqtaýǵa - 1,4 mlrd teńge, jańa mazmundaǵy oqýlyqtardy alýǵa - 2 mlrd teńge, 28 mektepti seısmıkalyq turǵydan kúsheıtýge 23 mlrd teńge baǵyttalǵan», - dedi ákim.

Sonymen qatar, ákim qalada memlekettik jekemenshik áriptestik aıasynda 175 balabaqsha ǵımaraty salynyp, 57 nysan paıdalanýǵa berilgenin aıtty. 

Osynyń arqasynda qala búdjetinen 14 mlrd teńge únemdelgen. 

---