InfoHub Logo

Saqtap qoıyńyz da, óz balańyzǵa daýsyńyzdy kótergińiz kelgen kezde qaıta oqyńyz.

«Qulaq sal, ulym. Bul sózderdi sen uıyqtap jatqanda aıtyp jatyrmyn; Sen kishkentaı qolyńdy jastanyp, qyryńnan jatyrsyń, al sap-sary shashtaryń terlegen mańdaıyńa jabysyp qalypty. Men ózim tynysh ǵana bólmeńe jasyryn kirdim. Birneshe mınýt buryn jumys bólmemde gazet oqyp otyryp, meni úlken ókinish tolqyny terbedi. Men seniń tósegińe óz kinámdi tolyq sezinip kelip otyrmyn.

Kóńil-kúıim bolmaǵan kezde ashýymdy senen alǵanymdy oılap qatty tebirendim. Sen mektepke barý úshin kıine bastaǵan kezińde, zattaryńdy jınaı bastaǵanda, árqashan, saǵan taǵar min taptym. «Óz aıaq-kıimińdi tazalamapsyń» dep kinárat izdedim. «Kıimderińniń bireýin edenge tastap kettiń» dep daýys kóterip, aıǵaılaǵanym esimnen keter emes. Tańǵy asta da saǵan tıisetin nárseler taptym: «shaıyńdy tóktiń;  tamaqty durys shaınamadyń; mańdaıyńdy stolǵa qoıdyń; nanǵa maıdy óte baıaý jaqtyń t.b»

Keıin sen oınaýǵa bara jatqanda, men poezdge asyǵyp bara jatyr edim. Sen burylyp,qolyńdy bulǵap: «Ákeshim saý bolyńyz!» dep aıǵaıladyń. Men bolsam, soǵan qabaǵymdy shytyp: «Jaǵańdy túze» dep jaýap berdim.

Sonymen, jumys kúniniń aıaǵynda bári qaıta bastaldy. Úıge kele jatyp, jerge tizerlep otyryp alyp sharmen oınap oytrǵynyńdy baıqadym. Seniń shulyqtaryń jyrtylyp qalǵan eken. Seni aldyma salyp alyp úıge ákelý arqyly joldastaryńnyń aldynda uıatqa qaldyrdym. Shulyq baǵaly edi, eger sen ony óz aqshańa satyp alǵanyńda, sen abaı bolar ediń!

Jumys bólmemde gazet oqyp otyrǵanda bólmege kelgeniń esińde me? Gazetten kózimdi alyp, maǵan kedergi keltirdiń degendeı ashýly kózben qaraǵan kezimde ne isterińdi bilmeı kire-beriste turyp qalyp ediń ǵoı. «Saǵan ne kerek?» dep dóreki suraǵan edim. Sen jaýap bermediń, júgirip kelip moınyma asyldyń da, betimnen súıip-súıip aldyń. Seniń qolyń moınymdy mahabbatpen qysyp qushyqtap tur edi.  Allah tarapynan júregińe ornalastyrylǵan bul mahabbatty meniń saǵan degen unamsyz qarym-qatynasym da joıa almap edi. Odan keıin aıaǵyńdy baıaý basyp, bólmeden shyǵyp kettiń.

Mine, osydan keıin, ulym, gazet qolymnan túsip, meni túsiniksiz qorqynysh sezimi baýrady. Meniń ádetterim meni qandaı jaǵdaıǵa túsirgen? Knálaý, min izdeý ádetim seniń kishkentaı bala ekenińdi umyttyryp jiberipti. «Seni jaqsy kórmedim» dep aıta almaımyn. Basty problema senen óte kóp nárse kútýim jáne ózimniń jasyma saı talaptar qoıýýym edi.

Al, seniń boıyńda óte tamasha, keremet minezderiń kóp. Kip-kishkentaı júregiń meıirimge toly. Buny men uıqyǵa keter aldynda moınymy asylyp, betimnen súıgen kezińde baıqadym.

Men seniń tósegińe qarańǵyda, eshkimge kórinbeı , jasyryn keldim. Aldyńa tize búgip otyrmyn. Bul meniń aıybymdy jýý áreketim  dese de bolady. Bunyń bárin sen oıaý kezde aıtsam, bulardy túsine almaıtynyńdy bilemin. Biraq, erteńnen bastap men NAǴYZ ÁKE bolamyn! Men senimen dostasyp, birge oınaımyn. Sen qaıǵyrǵanda birge qaıǵyryp, qýanǵanda birge qýanamyn. Aýzymnan seni kinálaıtyn, unamsyz sóz shyǵarda tilimdi tistesemde ózimdi toqtatamyn. Árqashan ózime ant berý sekildi  «Ol áli kishkentaı bala ǵoı» degen sózdi jıi qaıtalaıtyn bolamyn.

Men saǵan úlken jigit sekildi qarappyn. Al, qazir saǵan qarasam, seniń áli kishkentaı bala ekenińdi baıqadym. Keshe ǵana anańnyń qushaǵynda sábı ediń ǵoı,  men senen kóp nárse talap etken ekenmin...

Aýdarǵan: Eljas Ertaıuly

«Baqytty otbasy» otbasylyq keńes ortalyǵy

---