InfoHub Logo

Qurmanǵazy jaıaýlap el shetine kelip, biraq aýylyna barýǵa bata almaı, Jálel degen dosynyń úıine keledi. Jálel Qurmanǵazyny qoınyn ashyp qarsy alady. Biraq kúıshiniń úı ishiniń aman-saýlyǵyn aıtqanda azdaǵan áńgimesiniń kirbińin Qurmanǵazy sezip qalady. «El aralaǵan synshy bolady» degendeı, Qurmanǵazynyń qyraǵy kózine ol kirbeń ilinip qalady. Sol jerde Qurmanǵazy turyp: «Seniń áńgimeńniń túbinde aıtylmaı turǵan bir jaı bar ǵoı. Nesin jasyrasyń, aıt! Bizdiń úıde birdeńe bolyp qalǵan ǵoı» deıdi. Jálel biraz ýaqyt kibirtiktep, aqyry bolǵan oqıǵany kezegimen baıandaıdy. Ol kúıshiniń ákesi Saǵyrbaıdyń osydan eki aı buryn qaıtys bolǵanyn, osydan úsh kún buryn Áýes pen emizýli balasy Qazıdy Orynbordan soldattar kelip, qashyp ketken kúıshiniń ornyna «zaleke» dep alyp ketkenin aıtady.

Qurmanǵazy uzaq ýaqyt basyn kótere almaı, kúrsinip otyryp qalady. Basynan aýyrtpalyqtyń ketpeı qoıǵanyna nalıdy. Biraq «ýaıym túbi — teńiz, batasyń da ketesiń, táýekel túbi — qaıyq, minesiń de ótesiń» degendeı, áreń tamaǵynan ótken asty iship bolǵasyn, tujyrymdy sheshimge keledi. Ol sheshimin dosyna aıtyp, ózi sol túni sheshesine kóńil aıtýǵa, aman- esen kelgenin bildirýge, alǵan sheshimin aıtyp estirtýge úıine ketedi. Alqa ańyrap qalǵanyn balasyna shaǵyp, qansha myqty bolǵanmen qapelimde bir úıli jannan jalǵyz ózi ǵana qalǵanyna qatty kúńirendi. Biraq jaqsy kórgen balasy Qurmanǵazynyń tóbesin kórgesin kóńili biraz jubanyp, balasynyń Áýestiń sońynan qýý josparyn maquldaıdy. Tek Qurmanǵazynyń endi eshkimge qolyn tıgizbeýin, basqa qaýip tónip bara jatsa, eshkimge urynbaýyn tilek etedi. Barlyq ómirdegi qýanyshy men renishi, súıingeni men kúıingeni kúı arqyly syrtqa shyǵyp baryp kóńili bir jerge toqtaıtyn Qurmanǵazy, osy arada taǵy rýhanı joldasy dombyrasyn alyp, tolǵanady. Ákesiniń ólimine, Alqadaı anasynyń ańyrap qalǵanyna arnap kúı shertedi. Bul kúı keıin halyq arasynda «Alqa» atanyp ketedi.

---