InfoHub Logo

Jálel aýylyna jalǵas otyratyn bir baıdyń jylqysynan eki atty ustap alyp, birin minip, birin jetelep, Qurmanǵazy Áýesti alyp ketken soldattardy qýady. Kórgen kisilerdiń aıtýynsha Qurmanǵazy tóteleıdi. Al soldattar bolsa joldan shyqpaı, burańdap jerden utylady. Úsh kún ótkennen keıin Qurmanǵazy bir malshylardyń aıtýy boıynsha, otrádtyń qonalqyǵa toqtaıtyn jerine jaqyndaıdy. Saıdy, jyrany qýalap otyryp, soldattardyń qonyp jatqan jeriniń ústinen shyǵady. Soldattardyń ábden uıqyǵa ketken kezin ańdyp, qos atty yldıǵa baılap tastap, ózi jaıaýlap, aıdyń astyn ala soldattarǵa keledi. Olar myltyqtaryn eshkiniń múıizi sıaqty etip qalqaıtyp, bir-birine súıep qoıyp, shyrt uıqyda qannen-qapersiz jatady. Áýes shetirekte aldyna balasyn alyp, eńkeıińkirep otyr eken. Qurmanǵazy abaılap ysqyryp belgi beredi. Áýes Qurmanǵazynyń belgisin tanyp, jylamasyn dep Qazıdyń aýzyna emshegin salyp, qara shapandy búrkenip, eńkeıip júrip otyryp Qurmanǵazyǵa keledi. Qurmanǵazy Áýesti attaryn qaldyrǵan jaqqa jiberip, ózi «kerek bolady» dep myltyqtyń bireýin alyp, attaryna keledi. Sonymen, Qurmanǵazy Áýes pen Qazıdy alyp ketip qalady.

Soldattar ertemen bir-aq oıanyp, Áýestiń joǵyn kórip, aınaladan izdeıdi. Taba almaǵasyn qoldaryn bir siltep kete beredi. Orynborǵa kelip: «Qurmanǵazynyń áıeli kishkene emizýli balasymen dalada qonyp jatqanymyzda qashyp ketipti. Biraz jerdi sharlap izdedik, taba almadyq, qasqyr jep qoıǵan bolýy kerek», — dep aqpar beredi. Myltyqty bul oqıǵaǵa aralastyrýdan qorqyp: «bara jatqanda sýǵa túsirip aldyq» deıdi. Qurmanǵazy bolsa aman-esen aýylyna keledi. Soldattardan Qazı men Áýesti urlap alyp kelgenin aıtyp, Qurmanǵazy bir kúı baǵyshtaıdy. Ol kúıdiń aty «Buqtym-buqtym» bolady.

---