InfoHub Logo

«Altyn belgi» ıegerlerin pedagogıkalyq Joǵarǵy oqý oryndaryna emtıhansyz qabyldaý usynylyp otyr. Bul týraly Qazaqstan Respýblıkasy Bilim jáne ǵylym qyzmetkerleri kásipodaǵy tóraǵasynyń orynbasary Aıgúl Muqasheva Astanada «Pedagogtar mártebesi týraly» zań jobasyn talqylaý jıynynda aıtyp berdi.

«Ózderińiz biletindeı, zańnyń eki jobasy ashyq portaldarda jarıalanǵan bolatyn.  Birinshi jobada bizdiń pedagogtarǵa arnalǵan aıtarlyqtaı jaqsy áleýmettik paket qarastyrylǵan. Memlekettik organdarmen kelisilgen ekinshi jobada bizdiń muǵalimderge qarastyrylǵan kóptegen áleýmettik kepildikter - maquldanbaı, zań jobasynan alynyp qaldy», - deıdi Aıgúl Muqasheva.

Onyń aıtýynsha, talqylaý barysynda muǵalimder tarapynan birqatar usynystar túsken. Atap aıtqanda, mektep ustazdary qyzmet etken belgili bir ýaqyttan keıin zeınetke shyǵý, densaýlyqty jaqsartýǵa, emdelýge arnalǵan járdemaqylardy eki laýazymdyq aılyqqa deıin arttyrý, turǵyn úı baǵdarlamalaryna qatysý kezindegi jeńildikter, ǵylymı ataq úshin qosylatyn aqy jáne taǵy sol sekildi kepildikter engizý týraly usynystar túsken.

«Muǵalim mamandyǵyna jastardy kóptep tartý úshin pedagogıkalyq Joǵarǵy oqý oryndaryna «Altyn belgimen» bitirgen mektep oqýshylaryn bastapqy emtıhansyz oqýǵa qabyldaı alatyndaı jeńildik jasaý kerek. Sonymen birge, biz pedagogıkalyq mamandyqtarǵa oqyp jatqan stýdentterge kúnkóris mınımýmy mólsherinde shákirtaqy bekitýdi usynǵan edik. Alaıda ókinishke qaraı, sońǵy zań jobasynda bul normalar alynyp tastaldy. Bizge pedagogtardan óte kóp qońyraýlar men hattar túsip jatyr. Mine, osy usynystardy talqylaý úshin búgin dóńgelek ústelge jınalyp otyrmyz», - deıdi Aıgúl Muqasheva.

Aıta ketsek, qazaqstandyq bilim jáne ǵylym qyzmetkerleri kásipodaǵynyń uıymdastyrýymen Astanada ótip jatqan dóńgelek ústel jumysyna QR BǴM ókilderi, Parlament depýtattary, JOO rektorlary, ǵalymdar men muǵalimder qatysýda.

---