InfoHub Logo

Án sabaǵyn asyǵa kútpeıtin bala kemde-kem shyǵar. Matematıka, orys tili, qazaq tilinen sharshaǵanda án aıtyp sergıdi. Án sabaǵynyń muǵalimi Aıgúl de balajan. Jas ta bolsa, balany baýyryna tartqasyn olar da jaqsy kórip, ózimsinip alǵan. İshki pikirlerin de jasyrmaıdy. Sabaq kestesinde án sabaǵy beısenbi kúni 4-shi sabaq. Oqýshylarǵa apaıy tabaldyryqty attaǵannan synyp bólmesine nur quıylǵandaı áser etedi. Ózi kúngeı betke ornalasqan. Tabıǵattyń shýaǵy men jaqsy adamnyń peıili bir núktege toqaılasqasyn, bólmege jylylyqtan basqa ne kelsin?!

Aıgúldi jańa sabaqty bastamas buryn notalardy eki-úsh oqýshydan surap, este jańǵyrtatyn burynnan ádeti. Do-re-mı-fa-sol-lá-sı. Osy nota Janatqa qonbaı qoıdy. Ótken sabaqta do-re-sin durys aıtyp, mı-ǵa kelgende umytyp qaldy.

Ózi de ábden qınaldy. Bolmaǵasyn «bastyń ishindegi she?» dep barlyq oqýshyny kúldirgeni bar.

Ol oqý jylynyń jańa bastalgan kezi edi. Qazir bárin biledi. Sonda da bolsa qyńyr sózge balanyń áýes bolatyn ádeti emes pe? Sonyń ishinde qıqar Qabylan umytpaı, Janatty kórse óz basyn ózi shuqyp tura qalady. Ol – mı degen belgisi.

Jańa sabaq Qazaqstannyń gımniniń ánin úırenýden bastalady. Sózin ótken sabaqta dápterlerine jazdyrdy. Aıgúl apaı baıanmen qosylyp eki ret aıtyp shyqqasyn úshinshisine bári túgel qosyldy.
 
Altyn kún aspany,
Altyn dán dalasy.
Dýmandy bastaǵan
Elime qarashy...
 
Daýystarynda erekshe ekpin bar. Ol — perishte perzentterdiń eline, Otanyna, týǵan jerge degen adaldyǵynyń aıǵaǵy.

---