InfoHub Logo

Saqan aýylǵa dúnıeden ótip ketken áke-sheshesine quran oqytýǵa bardy. Saqandar bir áke-shesheden eki aǵaıyndy jigit. Aǵasy aýylda turady.

Saqan aýylǵa barǵannan keıin kórshisi Tolybaı aǵanyń úıine kirip-shyqpaq boldy. Ondaǵy bir oıy aýylda aǵaıyndarym az, erteń ózińiz kelip, bas-kóz bolyp júrińiz demek. Tolybaı, negizinen, jasy alpystan asyp ketken, qara jumys istep zeınetke shyqqan, balalarynyń aldy úılengen, solardan nemere kórip otyrǵan kisi. Minezi aq kóńildeý adam.

Saqan Tolybaıdyń aýlasyna kirgende, Tolybaı aýlada tur eken. Saqandy kórip elpildep qaldy. Saqan aýylǵa ne sharýamen kelgenin aıtqanda, Tolybaı basyn ızep Saqandy quptap-aq turdy. Saqannyń erteń úıde bolyńyz degen sózin estigende "baramyn, shyraǵym, baramyn, ishinde bolamyn" dep Tolybaı taǵy da elpelektedi. Osy Tolybaıdyń qartaıǵan sheshesi bar edi. Saqan endi Tolybaımen áńgimelesip bolyp, Tolybaıdyń sheshesine de amandasyp shyqpaq boldy.

- Sheshem úıde me? - dedi Saqan Tolybaıǵa.

- Úıde, úıde ájeń! Kire ber! - dedi Tolybaı elpelektep.

Saqan aıaq kıimin sheship úıge kirdi. Tolybaıdyń kelinderiniń biri Saqanǵa iltıpatpen amandasyp: "Áje myna jaqta, kire berińiz", - dedi. Tolybaıdyń aıaǵy shyqqan nemereleri Saqannyń aldynan júgire shyǵyp, biri oń qolyn berip, biri shatasyp sol qolyn berip amandasyp jatty. Saqan olardyń kishkentaı qoldaryn aýyrtyp almaıyn degendeı, aqyryn qysyp, bastarynan bir-bir sıpady da, kempir otyrǵan bólmege kirdi.

Kempir áli tyń. Kózi de jiti, qulaǵy da saq. Saqandy birden tanydy. Aınalyp-tolǵanyp baqty. Saqannyń aýylǵa kelgendegi maqsatyn estigende "eı, qaraǵym-aı..." dep eljirep qaldy. Kempirdiń qulaǵy anyq estip otyrsa da, Saqan, nege ekendigi belgisiz, aıqaılaı sóıledi:

- Tolybaı aǵama da aıttym! Erteń úıde bolyńyz dedim! Ózińiz úlkendik jasap, bas-kóz bolyp júrińiz dedim!

Saqan osyny aıtty da, kempirden jaýap kútip, tynshı qaldy. Kempirdiń ózin qoshtaıtynyna senimdi edi. Biraq kempir basqasha minez kórsetti.

- Úıbýı, qaraǵym-aı! Tolybaıjanǵa nesine aıtasyń? Tolybaıjan degen áli bala emes pe? - dedi kempir.

Saqan kempirge aýzy ańqıyp qarady da qaldy. "Qaıdaǵy bala?! Jasy alpystan asyp ketken adam".

Saqan ájeniń oıyn úıge kelgennen keıin baryp qana uqty. Sóıtse, analarǵa balasy neshe jasqa kelse de, áli bala bolyp qala beredi eken ǵoı. Meıli, tipti ata bolyp ketse de. Birdeńeni búldirip alardaı qaýpalaqtap otyrady eken. Saqan osyny túsindi, túsindi de, ájeniń kóńiline aqjarqyn keıippen jymıdy.

---