InfoHub Logo

Android OJ (Androıd operasıalyq júıesi) ornatylǵan smartfondar ár túrli pishimde jáne kólemde jasap shyǵarylady, biraq ish jaǵynda olardyń barlyǵy bir ǵana bazalyq negizde isteıdi. Android kodynyń smartfondy naqty paıdalanyp júrgen adamnyń qajettilikterine beıimdep beretin baptamalary bar. Ókinishke oraı, paıdalanýshylardyń ózderi smartfondaryn ózderine qoldanýǵa yńǵaıly etip alýǵa asyqpaıda da, smartfondy defolt (baǵdarlamanyń bastapqy zaýyttyq nusqasynda paıdalanylatyn mánder) boıynsha paıdalanyp júre beredi. Biz smartfondy jyldamyraq jáne jaqsyraq isteıtin etip baptaýǵa múmkindik beretin keıbir ózgertýlerdi jınaqtadyq.    

Kastomdyq qara tizim

Belgili bir kontaktilerdi buǵattaıtyn qosymshalardy paıdalanýdyń kádimgideı qaýpi bar — smartfonǵa neshe túrli báleni juqtyrýyńyz múmkin. Jalpy alǵanda olardyń keregi de joq: Android jaǵymsyz abonentterdi týralap daýystyq pochtaǵa jiberip otyrýǵa múmkindik beredi. Qajetti kontaktini tańdańyz da, mázirde «Tek daýystyq pochtany» belgileńiz.  

Bos jad

Eger smartfonyńyzǵa Android 7.0 Nougat nemese odan keıinirek shyqqan nusqasy ornatylǵan bolsa, siz Smart Storage fýnksıasyn paıdalana alasyz. Ol fýnksıa avtomatty túrde bos orynnyń jetkiliksizdigin aıqyndaıdy da, sırek qaralatyn foto- jáne vıdeofaıldardy bulttyq qoımaǵa jiberedi.   

Qaýipsiz rejım

Bul paıdaly fýnksıa týraly, nege ekenin, kópshilik bilmeıdi. Android paıdalanýshyǵa kez kelgen sátte smartfondy Safe mode rejımine qoıýǵa múmkindik beredi: operasıalyq júıe barlyq bógde qosymshalardy óshirip, ózi qosylady. Bul qosymshalardyń qaısysy júıeniń qatyp qalýyna aparyp soǵyp otyratynyn anyqtaý úshin nemese qaısysy batareıa resýrsyn basqalardan kóbirek tutynatynyn bilip alý úshin paıdaly bolmaq.  

Basty ekrandy tazalaý

Barlyq qosymshalar ádepki tártip boıynsha basty ekranǵa tańbashalaryn ornatady. Áńgime paıdaly qosymsha týraly bolsa, bul óte yńǵaıly, al jıi qoldanylmaıtyn qosymsha týraly bolsa, jynǵa tıip bitedi. Google Play baptaýlaryn ashyńyz da, pozısıadan «Tańbalardy qosý» qusbelgisin alyp tastańyz. Aıtpaqshy, sol jerde qosymshalardyń avtomatty túrde jańartylyp otyrýyn óshirip tastaýyńyzǵa bolady.  

Jyldam baptaý

Eki saýsaǵyńyzben ekrandy tómen qaraı sıpasańyz, Android-tyń jyldam baptaý paneli ashylady. Ol Wi-Fi, Bluetooth, qolsham sıaqty baptaýlarǵa dereý kirýdi qamsyzdandyrady. Onyń ústine, paneldi kastomızasıalap jiberýge bolady: tómengi sol jaq buryshtaǵy qalam belgisin (keı qurylǵylarda tómengi oń jaq buryshta «óńdeý» degen sóz turady, sony túrtý kerek) bassańyz, osy jerge kez kelgen qosymshany salyp qoıa alasyz.

Telefondy izdeý

Telefondy joǵaltyp qoıýdan qorqasyz ba? Onda Android-tyń ornatylyp qoıǵan qurylǵynyń qaıda ekenin qadaǵalap otyrý júıesin qosyp qoıyńyz: «Baptaýlardy» ashyńyz, «Qaýipsizdik jáne ornalasqan jerge» ótińiz de, «Meniń qurylǵymdy tabýdy» túrtińiz.  

Shrıft ólshemin úlkeıtý

Android-taǵy kóbinese qolaısyz bolyp keletin shrıftterdi oqyǵanda kózdi syǵyraıtýdyń jáne taldyrýdyń endi qajeti joq. «Baptaýlar» qosymshasyn ashyńyz da, «Ekrandy» tańdańyz, sodan soń, ózgertýler engizý úshin, «Shrıft ólshemin» basyńyz. Ózgertýlerdi engizý úshin silteýishti (ýkazatel) syrǵytpa (polzýnok) boıymen jyljytyńyz jáne aqyrǵy nátıje qandaı bolatynyn anyqtaý úshin aldyn ala kórý terezesin tekserińiz. Android-tyń qajetti shrıft ólshemi ornatylǵan soń qosymshalardyń kópshiligi ony avtomatty túrde qoldanyp otyrady.  

---