InfoHub Logo

- Ne anekdot?! Ne anekdot?!

- Aý, aıtaıyq ta áýeli.

- Al, aıtshy armanda qalmaı!

- Bir kúni Brejnev Olımpıadany ashyp jatqan ǵoı. Sodan sózin bastap jatyp "O" deıdi. Jurt dý qol shapalaqtaıdy. Ekinshi ret taǵy da "O" deıdi. Jurt taǵy da dý qol shapalaqtaıdy. Úshinshi ret "O" degende, jurt tym-tyrys. Sol kezde kómekshileriniń biri júgirip kelip: "Leonıd Ilıch, sizdiń oqıtyn tekstińiz tómengi jaǵynda. Siz Olımpıadanyń emblemasyn oqyp tursyz", - depti.

Biraq Qaldygúl Naǵı aıtqan bul anekdotqa kúlgen joq.

- Qudaı, sol mazaq qylǵanyń men bolsyn! - dedi.

- Ne, sen Brejnev pe ediń?

- Sol meniń oqymaǵandyǵymdy betime basyp otyrsyń ǵoı. Sen oqydyń ǵoı, al! Oqyǵanda, birdeńe bitirip jatsyń ba?!

- Seni bireý oqymaǵan dep jatyr ma?

- Qudaı, ózi bizdiń úıdiń qyzdarynyń baqytyn ashpaı qoıǵan ǵoı biraq. Sapagúldiń de, Tazagúldiń de. Sapabektiki ne deseıshi, bolmasa, óńkıip alyp. Kúıeýdiń úlkenimin dep turǵan ol joq. Qıt etse, Brejnev jaıly anekdot aıtady. Qaıta bizdiń úıdiń qyzdarynyń ishinde oqyǵany Sapagúl shyǵar. Sapagúlge ne dep kiná taǵady? Ákem degen qandaı qylyp oqytty Sapagúldi. Sony bilip otyrǵan Sapabek bar ma?!

- Sapabekke ne bopty? - dedi Naǵı. - Sapabek - aqkóńil, ázilqoı jigit.

- Iá, qoıshy! Nartaıdiki ne deseıshi, al? Kúıeýdiń kishisimin dep turǵan ol bar ma?

- Nartaıǵa ne boldy?

- Ótkende mamamnyń úıine iship barypty. Ásheıinde saý kezinde barmaıtyn edi sol úıge! Ótkende mamam degen jarty qap undy kóterip qalamyn dep, beli kilt ete qalypty. Sol undy qoıyp beretin bala sol! Zińgitteı neme, qaıyry joq!

- Aý, aıtsa, qoıyp beredi ǵoı.

- Nesin qoıyp beredi endi, kilt etetin jeri kilt etip bolǵasyn?! Endi kete qoıatyn shyǵar dese... Joq! Ketýdiń ornyna... Mamamnyń janyna jaıǵasyp otyryp alyp... Qudaı, tóbeńdi kórme, Nartaı! Óı, ana syılap kórmegen neme!

- Aý, ne istegen sonshama?

- Ne isteıtin edi? Anekdot aıtqan da!

- Ne anekdot aıtqan sondaı-aq?

- Ne anekdot aıtatyn edi? Nartaıdan bir jóni túzý sóz shyǵatyn ba edi? Brejnev jaıly aıtady da. Ony estip mamamnyń túnimen júregi aýyryp shyqqan. Ózi júregi aýyratyn kisi.

- Túk túsinsem buıyrmasyn! - dedi Naǵı. - Ol kisiniń Brejnev jaıly anekdotqa nemenege júregi aýyrady?

- Sony bir Nartaı jóni túzý oımen aıtyp otyr deısiń be? Sen de sol qusap qartaıǵansyń, aljydyń dep otyrǵan joq pa ońbaǵan Nartaı.

- Óı, qoıshy, sen de!..

- Ne, qoıshy! Senderge salsa, bir-birlerińdi jaqtap shyǵa kelesińder. Ony estip Sapagúl jylap. "Kógermegir Nartaı, Tazagúlge aıtqan anekdottary az bolǵandaı, endi ylańyn mamamnyń úıine baryp salaıyn degen be?" dep. Ol Tazagúlge zvandap. Odan Tazagúl jylap. Ol Nartaımen ursysyp. Áıteýir, sol kúni Tazagúldiń úıinde úlken bir urys bolǵan. Nartaıdiki ne deseıshi osy?! Tazagúldi alǵansha qandaı bolyp júrdi, bolmasa. Sol Tazagúldi alǵasyn shyǵar qaıta baqyty ashylyp otyrǵany. Nartaıdy kórsem, ıt terisin basyna qaptaıyn dep edim. "Sen kimdi basynasyń osy? Adamy joq úı dep otyrsyń ba? İzdese, tabylady adam. Kúıeýsiń be, jónińdi bil, shyraǵym! Paıdańdy tıgizbeseń de, zıanyńdy tıgizbeı júr jurtqa!"

Basym-aı! Basym! Eki shekem solqyldap ketedi osy, sóılesem.

- Solqyldamaı neǵylady, sóıleı berseń?

- Sóıleıin dep, sóılep otyr deısiń be?! Sen sóıletip otyrǵan joqsyń ba adamdy?!

Sen qyzǵa bar dep otyrmyn ana jaqqa! Bar dep otyrmyn ana jaqqa! Nege sabaǵyńdy oqymaısyń?! Meniń aýzyma qarap áńgime tyńdap otyra bergenshe! Jınashy myna jerdi! Sosyn sabaǵyńdy oqy! Alyp ket ana balany qasyńa! Kitap pa, dápter me, birdeńe berip aldandyryp qoı. Osy telefon qaıda? Tazagúlge zvandap jibereıin. Áı, qyz, telefon qaıda deımin saǵan?! Ne melshıip tur myna qyz?! Osy qyz ósken saıyn jaman bolyp bara jatyr biraq! Bar, qarashy ana bólmeni! Ústeldiń ústinde qaldy ma eken?! Ákel beri!

- Al sóılesip alyńdar, - dedi Naǵı. - Men ana bólmege shyǵa turaıyn.

Myna bólmeden Qaldygúldiń syńqyldaı kúlgen daýsy estildi:

- Áló! Qalaısyńdar? Óı, qurysyn! Eki shekem solq-solq etip... Ne bolatyn edi? Sol baıdyń myryńy da! Qudaı, ózi bizdiń úıdiń qyzdarynyń baqyty ashylmaı qoıǵan ǵoı. Jurttyń úıiniń qyzdarynyń baqyty gúl-gúl jaınap ashyla qalady. Iá... Sol... Taǵy da anekdot... Brejnev týraly.

---