InfoHub Logo

Baıaǵyda bir áıel ómir súripti. Ol óziniń úsh qyzyn ash-jalańash qaldyrmaı asyrap-baǵý úshin kún-tún demeı jumys istepti. Úsh qyz qarlyǵashtaı sylanyp, aıdaı tolysyp, tez boı túzepti. Birinen soń biri turmysqa shyǵyp, alysqa uzatylypty.

Arada birneshe jyl ótedi. Kári ana qatty aýyryp, shıkil sary tıindi qyzdaryna jumsaıdy.

— Dostym, olarǵa aıtshy, tezirek jetsin, — deıdi.

— Oı, — dep kúrsinedi úlken qyz, tıinnen qaıǵyly habardy estisimen, — Oı! Men qýana-qýana barar edim, myna eki shylapshyndy tazalaýym kerek!

— Eki shylapshyndy tazalaýym kerek deısiń be? Ómir-baqı solardan ajyramaı qal! — deıdi tıin ashýlanyp.

Shylapshyndar kenetten ústeldiń ústinen atyp turyp, úlken qyzdy asty ústinen túgel qorshap alady. Ol edenge qulap túsedi de, úıden úlken tasbaqa bop jyljyp shyǵa beredi.

Tıin ekinshi qyzdyń esigin qaǵady.

— Oı, men qazir-aq shesheme jetip barar edim, qolym tımeı jatqanyn qarashy: jármeńkege aparatyn kenepti toqýym kerek, — dep jaýap beredi ol.

— Onda esh tynym almastan ómir-baqı toqı ber, — deıdi tıin. Sóıtip ekinshi qyz óremekshige aınalyp ketedi.

Al kishi qyz tıin esigin qaqqanda nan ılep jatyr eken. Ol bir sózge de kelmesten, tipti qolyn da súrtýge murshasy bolmaı, sheshesine qaraı tura júgiredi.

— Árqashan da adamdarǵa qýanysh syılap júr, aınalaıyn, sonda jurt ta seni kóziniń qarashyǵyndaı saqtap, seniń balalaryńdy da, nemerelerińdi de, shóberelerińdi de jaqsy kóretin bolady, — deıdi tıin.

Shynynda da úshinshi qyz uzaq ómir súripti, ony barlyq jurt jaqsy kóripti. Al ol ajal máýriti jaqyndaǵan kezde altyn araǵa aınalyp ketipti.

Jaz boıy ara damyl tappaı adamdarǵa bal jınaıdy… Al qysta aınalasyndaǵylardyń bári aıazǵa urynyp sýyqtan qyrylyp jatqanda, ara óziniń jyp-jyly omartasynda uıyqtaıdy, ol oıanǵan kezde tek qana bal men qant jeıdi eken.

Orys tilinen aýdarǵan Baıbota Qoshym-Noǵaı

---