InfoHub Logo

Meniń tórt ápkem bar. Eń kishisi menen bir-aq jas úlken. Ekeýmiz bir synypta oqydyq. Men birinshige barǵanda úıimiz kishkentaı temir jol stansasynda edi. On úsh shaqyrym jerdegi mektepke aýyl balalary esekpen qatynaımyz. Sheshem tań alageýimde turǵyzady. Tura salyp, ákemniń úıretkenindeı esekti ózim ertteımin. Kórshi balalardyń aýyldan shyǵyp bara jatqanyn kórgende, esekke yrǵyp minip, úı janynda shúberek sómkesin asynyp turǵan ápkemniń aldyna kelip kóldeneńdeımin, ol erdiń artyna mingesedi. "Al, Taıshyq, tart qane" deımin jyrdaǵy batyrlarsha tebinip. Taıshyq meniń esegimniń aty. Alpamys batyrmen soǵysqan qalmaq hanynyń esimi bul. Aqjem jolǵa bir túsip alǵan Taıshekeń ádetinshe basqalardan alǵa ozady. Qurǵap qalǵan sazdaýyt saıdan óte bergende esegim jeńildenip qalǵandaı ytqı jóneledi. Tizgindi tartyp, keıin burylamyn, ápkem ádettegideı kesek-kesek kepken saz balshyqtan qaltasyn toltyryp, júgirip kele jatady. Qabaqty qars túıip, esegimdi kóldeneńdetemin, yrǵyp minedi. Qaıtadan jolǵa túsemiz. Ápkem saz kesekti qytyrlata jep otyrady.

Tómengi synypta júrgende muǵalimder maǵan uryssa, eresek balalar tıisse, aldymen ápkem jylap qoıa beredi, ony kórip, keıde men de jylaımyn...

Menen keıingi inim Ómir jasynan talma aýrýly boldy. Sekseninshi jyldary dúnıeden ozdy. Al bizden úsh júz shaqyrym qashyqtaǵy maldy aýylda turatyn ápkemderge habar "Temir qaıtys bolypty" degen syńaıda jetken. Bir kezde botadaı bozdap ápkem jetti. Sonadaıdan "birge oınap, birge oqyp edim, qudaı endi senen de aıyrdy-aý, baýyrym. Temirim", — dep jylaıdy. Úıdiń ishi de abyr-sabyr. "Ol iniń emes, odan kishisi" demek bolǵandardy tyńdar emes, meniń atymdy jylaýǵa qosyp ańyratty dersiz. Bireýler maǵan ym qaqqan soń, shydaı almaı esikten men kórinbeımin be. Ushyp turyp, qushaqtap alyp bosatar emes, ózi jylap júr.

Ápkem qazir Qyzyltóbede turady. Ulyn uıaǵa, qyzyn qıaǵa qondyra bastaǵan kóp balaly ana. Álige deıin taı-qulyndaı tebisip ósken men degende iltıpaty erekshe. Birdeńe bolsa, qanatymen sý sepken qarlyǵashtaı bolyp, aldymen jetetin de sol Ápkem meniń...

---