InfoHub Logo

Bala kezimde mektepten úıge kele jatyp tyń tyńdaıtynmyn. Shyńyldaǵan tós pen balǵa úni qulaqqa kelse, esikten kire portfeldi atyp uryp, apyl-ǵupyl kıinip, ustahanaǵa júgiremin. Kórshi Túgel aǵaı temir soǵyp jatady. Shaǵyn ustahana ishi kákir-shúkirge toly, munda ne joq deısiz? izdegen shegeńdi, boltyń men gaıkińdi tabasyń. Aǵaı árdaıym "kel, kel" dep, kúlip qarsy alady. Men temir-tersekten góri aǵaıdyń áńgimesine qumarmyn.

— Meniń ákem soǵystan oralmady, — deıdi ol birde muńaıyp, — myna qaıyńdy soǵysqa keterde óz qolymen otyrǵyzǵan. Sonaý bir jyldary osynda qurylys salý úshin kelgender: "jol tartýǵa bóget jasaıdy" dep, aǵashty qulatqysy keldi. Biraq sheshem jylap-eńirep, alyp qaldy. Beri júr birdeńe kórseteıin. Aǵaı japyraǵy sybdyr qaqqan, tip-tik bop ósken aq qaıyńnyń janyna kelip, aǵashtyń tizeden joǵary jerindegi qara daqty sıpap turyp:

— Mynaý sondaǵy baltanyń izi. Bir áýmeser traktorshy áı-sháı joq baltalap jatqanda, sheshem qolyna jabysyp, shaptyrmaǵan, — dep maǵan qaraıdy.

Men jup-juqa qabyǵy aq qaǵazsha jelbiregen qaıyńnyń shoıyrlanyp bitken jaraqattaı bileýlengen dińin qolymmen aıalaı sıpalaımyn...

Uzaq jyldardan keıin jolshybaı baıaǵy balalyq shaǵym ótken aýylǵa soǵýdyń sáti tústi. Aýyl kóp ózgergen. Oqtaýdaı kóshe, shatyrly aq úıler. Men biletin kóptegen adamdar, Túgel aǵaı da baqılyq bolypty. Aǵanyń shańyraǵyn ıelengen keshegi qara domalaqtar, búginde azamat bop, shekesinen qaraıdy.

Óz úıimniń ornynda ótkendi eske alyp, uzaq turdym. Áldene esime túskendeı jalt qarasam, áli bar eken — baıaǵy aq qaıyń. Japyraǵy jelmen oınap, alaqan soqqandaı sýsyldaıdy. Eriksiz burylyp, janyna bardym. Burynǵydaı emes, butaqtary salbyrap, tamyrlary bilemdenip ketipti. Kútimsizdigi kórinip tur. Baltanyń izi bitip, shodyraıǵan kózge aınalǵan, sıpap edim, qolyma móldir tamshy ilikti.

Aq qaıyń jylap tur...

---