InfoHub Logo

Birde issaparmen Almatyǵa jol tarttym. Jolaýshylar poıyzynyń kýpeli vagonyna Qulsarydan bir túrik jigiti otyrdy.

Esimi Shavhat qurylys ınjeneri eken. Eki aı jumys jasapty, qurylys salyp, endi Almatynyń túbindegi úıine qaıtyp barady. Tanysyp, bilisip, áńgime aıtyp, Qandyaǵashqa jettik. Túsip, basqa poıyzǵa otyrýymyz kerek. Jaıbaraqat edik, túsetin kezde qapyldyq ta qaldyq. Vokzaldyń kútý zalyna kelgende ǵana saqal qyrǵysh, sabyn sıaqty, usaq-túıek bolǵanmen, jolda qajet zattarymnyń kýpede umyt qalǵanyn bir-aq bildim.

Úıimmen habarlasýdy oılap, vokzal ishindegi telegrafqa birneshe bardym. Baılanys bolmady. Sarylyp, keshigip jetken poıyzdy kúttik. Bıletimizge kóz salsaq, ekeýmiz taǵy bir kýpede ekenbiz. Sharshap-shaldyǵyp, aıqaı-uıqaımen poıyzǵa ilikken edik, ornymyzda úlde men búldege bólengen saýdager áıel boıjetken qyzymen jatyr. Qolynda bıleti bar bizge pysqyryp ta qaraǵysy joq. Olardy qyzǵyshtaı qoryǵan jolserikpen aıqaılasyp, ornymyzdy aldyq-aý.

Jazdyń kezi, salqyndatqysh iske qosylyp, perdeleri túsirýli vagonnyń ishi qońyr salqyn. "Shymkentke taıap qaldyq" degen soń perdeni asha bergenim sol edi, syrttan laqtyrylǵan balanyń basyndaı tas vagon terezesin byt-shyt qylyp, kókiregime tıdi. Bilegimdi, qolymdy shyny jaryqshaqtary tilip ketti. Shavhat ıod pen bınt izdep, júgirip júr.

Tósegime jaıǵasqan soń:

— Shavhat, meniń jolym jeńil edi. Osy saparym óziń kórgendeı sátsizdikke toly. Bul nelikten eken?

Shavhatym ıyǵyn kóterip, maǵan qaraıdy.

— Aǵaı, — deıdi ol taza qazaqsha, — men qaıdan bileıin.

Birazdan keıin basymdy kóterip:

— Shavhat, beri qara, — dedim. Ol "taǵy ne bolyp qaldy" degendeı ornynan ushyp turdy.

— Onyń sebebi, — dedim basymdy kóterip, — moınymda boıtumarymnyń joqtyǵynan. Kýpege ornalasyp, kıim aýystyrǵanda shalbarymnyń qaltasyna salǵanmyn, sodan umytylypty.

— Oıboı, aǵa, endeshe tez alyp taǵyńyzshy, — dep Shavhat báıek bolyp jatyr. Men de boıtumarymdy moınyma taqqansha asyqtym.

---