InfoHub Logo

― Tańǵa deıin júre berse...

― Onda sen qorqar ediń.

― Men be? Qoryqpas edim.

― Shyn aıtamyn, qorqar ediń.

― Eregistirseń, qazir me...

Qyz ilgeri shyǵyp, aryq kemerimen júgire jóneldi. Taldyrmash denesin tún qarańǵylyǵy tasalaı bere, dymqyl kóktiń arasyna jasyryndy. Ine jasýyndaı ýaq tamshylar betine, qolyna tógilip, kermek lepti jýsan ıisi jelpidi. Asyǵys lúpildegen kishkene júregin saýsaqtarymen basyp, arttan shyǵar dybysty tyńdap, biraz jatty. Kók astynan kórinbeı shyryldaǵan shegirtke úninen basqa eshbir belgi baıqalǵan joq, japyrylǵan shópter ǵana basyn shulǵyp, birtin-birtin kóterilip qoıdy.

Sál-pál tynyshtyqtan keıin "Tabı-ǵa-a-a" degen jigit daýsy aqyryn shyǵyp, talmaýrap qalqyp aýaǵa sińdi. Uıqyly beıýaq selt etkendeı, "a" dybystary syrǵanaq samalmen taıǵanap, qara qońyr tún ishine shashylyp tústi.

"Qorqaqty tapqanyn, izdep kelgenshe jata bermesem, ákel qolyńdy".

Qyz esimin ataǵan álgi daýys qaıtalandy. "A" dybystary taǵy kóterilip, biraz júrip álsirep baryp taǵy óshti.

"Iá, dybystarmyn. Aıaq astynan batyr bola qalýyn óziniń".

― Ar jaǵyńdaǵy qaraıǵan qara júgirip keledi.

"Aıta bergin, qoıan júrek emespin!"

Bala júregine elegizý sıaqty yńǵaısyzdyq kirdi. Jeke ózi mundaı áreketke bara alar dep oılamaǵan edi. Bir-birine ıyqtaryn súıesken tal japyraqtary da qybyrsyz, joldasy jasyrynǵan qara buldyr tús ta ún-túnsiz túnerip tur.

― Tabıǵa! - Diril aralas qaltyraǵan daýys alysqa estilip, jańǵyryq atty. Jetimsiregen jalǵyz únge jasyl quraqtyń bastary ǵana qurǵaq sybdyrlap, tógilip túskendeı sý-sý etti... Uıyǵan sútteı únsiz momyndyqty qanattarymen tilgilep, asyǵys sýsyldaǵan bir top úırek jer baýyrlaı ushyp ótti. Saý-saý soqqan qanattarynyń gýili jigit qulaǵynyń túbinen ysyldady. O da bolsa úreı shaqyrǵandaı. Sekemshil kóńilmen qyz tyǵylǵan baǵytqa daýystaı bergende "pyr" etken dybystan shoshynyp, aıqaılap jiberdi. Úrkip, sasqalaqtap kóterilgen tún torǵaıy áp-sátte-aq ǵaıyp bola berdi...

― Iá, naǵyz-aq er ekensiń, - dep syqylyqtap kúlip, túregele bergen serigin uıalý men qýanyshy aralas qushaqtaı ketti.

― I-ı, jasyrmaı-aq qoısańshy, aıqaılap jibergeniń búkil aýyldy oıata jazdady ǵoı.

― Ras, sen úshin qoryqtym.

― Túk te emes, óziń úshin... endi jasyrynsam, taptyrmas edim.

― Kerek emes, jibermeımin.

― A, qoryqtyń ba?

― Sensiz jerde qorqady ekenmin.

― Sen jalpy-aq solaısyń.

Jigit jaýap retinde, jaqyn tartqan erkelik senimmen qyz júregine betin basty. Qyz tarapynan jaıshylyqtaǵy qarsylyǵy baıqalǵan joq, álsiz ǵana qolynan ıterdi. Únsiz bolsa da osyny qalaǵan qysqa merzim bir shamaǵa sozylǵan edi, qyz tartynyp, burylyp ketti:

― Bylaısha-aq júrelik...

Ekeýi de únsiz ilgeri júrip, biliner-bilinbes qybyrmen syrǵyǵan ózen sýynyń jıegine keldi. Ózen ishine tógilgen aspan juldyzdary tynymsyz shaıqalyp, damylsyz qaınaǵan joq, búgingi tún bultty bolǵandyqtan, qos búıiri qaraýytyp, shytýly qabaqtaı qońyr, susty. Shabaq úıirindeı qýysyp oınasqan qaımaqsha - dóńgelek ıirimderi de kóz kórimge baıqalmaı, anda-sanda oıylyp túsip, sar ete qalatyn daýsynan ǵana sý ekeni ańǵarylady.

Tozǵan kıizshe setineı bastaǵan qalyń bult jyrtyǵynan tańǵy shyq tamshysyndaı bir juldyz sý túbinen kórindi.

― Juldyzym!..

― Qaısy?

― Qazir ǵana sý túbinen kórinip ótti.

― Qalaısha ol seniń ǵana juldyzyń?

― Ol meniń qıalym tárizdi, qashyqta turyp jyly ushyraǵan meıirimi oılarymdy áldılep, alys saparǵa shaqyratyndaı bolady da turady. Men ony jaqsy kóremin.

― Men de oǵan ushýdy armandaıtynmyn.

― Biraq senen kosmonavt shyqpas edi.

― Ne sebepti shyqpas edi?

― Sebebi sen tym qorqaqsyń.

Jigit odan ári talasqan joq. Baýyryna tartyp, ózine sanaǵan qyz áziline súısingendeı bolyp, tyqyr ósken qysqa kókti sıpalaı únsiz otyrdy...

Aınala tym-tyrys. Lepteı bop meıirli samal jelpidi. Býmen bultqa bólengen jumsaq túnniń typ-tynysh shaǵy. Aýyldyń ıtteri de úrmegen, baqalardyń shýyly da basylypty. Jigit júreginiń lúpilindeı tynymsyz qaltyraǵan sý quraǵy ǵana úzdiksiz dirildep, silkinip tur...

Jigit qyzdyń betine qaraǵan edi, jaıshylyqtaǵy oınaqshyp turatyn qaraqat kózderi ishteı jýasyp, ózi biler bir syrdyń sheshimin tappaǵandaı telmirip qalypty. Úı erkeliginen aryla qoımaǵan oınaqy reńi de áldenendeı muńǵa beıim. Samal jelpigen maıda shashy mańdaıyna salbyraǵan kúıi, momaqan pishinde únsiz otyr.

Jigit qolyndaǵy kesek tasyn qoıý aǵynǵa laqtyryp jiberdi. Maısha sozylyp, tutas aqqan ózen sýy "sholp" ete túsip, kilegeı tynyshtyq dir-dir etti. Qyz beıqam otyrǵandyqtan, oqys daýystan seskenip, jigit bileginen ustaı aldy:

― Qorqytpaǵyn meni!

― Sen batyr emes pe ediń qazir?

― Men qorqaqpyn...

Qyz jigit qushaǵyna tyǵyla tústi...

***

Túnniń biraz ýaqyty ótken. Topyraq tárizdes bozamyq bult tún qarańǵylyǵymen qoıýlanyp, úgilerdeı bop, tunjyrap tur. Búrikken tamshy bolmasa da, jas jaýynnyń dymqyl ıisi emes-emis bilinip ótedi. Alysta, qıan jyraqtan únsiz, tynymsyz jarqyldaǵan naızaǵaı ottarynyń qym-qıǵash syzyqtary kórinedi.

― Erbol, jaýyn keledi.

― Iá, jaýyn keledi.

― Men jaýyndy unatamyn.

― Qazir-aq malshynǵan sý bolarsyń onda.

― Solaı bolsa da...

― Men túndi unatamyn.

― Sen seskener qorqynyshy kóp qoı onyń.

Aptyǵyp samal júgirdi, qastaryndaǵy aǵash japyraqtary shýyldaı jybyrlap, alaqan soqty.

― Júre turshy, qazir baramyn.

― Taǵy da jasyrynbaqpysyń?

― Joq, qazir baramyn...

Uıqyly aýyldyń árbir jerin teskilep túngi qoraz da aıqaılady, kún kúrkiriniń daýsy estilip, birte-birte jaqyndaı tústi.

― Aǵash túbinen bir nárse qaradyń ba?

― Esh nárse qaraǵam joq.

― Al anaý aǵarǵan ne?

― Ol meniń bantıgim, ádeıi qaldyrdym!..

Qyz kózindegi monshaq jastardy joldasy baıqaǵan joq. O jer, bul jerge tıip, sırek tamshylaǵan tún jańbyry sebeleı bastady. Naızaǵaı jazýlary tipti jaqynnan jyltyldap, ırek-ırek ushqyn oınatty. Qyz alysqa shyǵyp, ornyna qarady. Qarańǵyda aǵarańdap, kómeski juldyzdaı aqshyldanyp kóringen aq bantıgi álsin-álsin alystaı berdi...

---