InfoHub Logo

...Erterekte Kókshetaý óńirindegi Aqan elinen bir úıir jylqy joǵalady. Joqshylar malynyń izimen suraý sala júrip, júzdegen shaqyrym jerdegi Ulytaý, Qarsaqbaı tóńiregindegi qalyń Naıman eline barady. Aıǵaqtardyń silteýimen at basyn dańqty shonjar Sandybaı aýlyna tireıdi. Tikeleı Dúzen aqsaqaldyń úıine túsedi.

Bul kez Dúzenniń qartaıyńqyraǵan shaǵy, tórt balasymen ózara keńesip otyrǵan ústine keledi joqshylar. Jón surasty. Joqshylardyń basshysy Janataı batyrdyń balasy Jumabek:

— Bir úıir malym joǵaldy. Birneshe kúndik jerden izimen keldim. Tobyn jazbastan osy qotanǵa kelip kirdi. Tatý-tátti Arǵyn, Naımannyń balasymyz, ala almaı júrgen kegim joq. Malymdy túgendep ber, kelgen jolymmen qaıtamyn, — dedi.

— Áı, sen kimdi ury deısiń, qaıda otyrǵanyńdy bilemisiń, — dep Dúzenniń tórt uly birden ejireıe qaldy. Ata-tegin balaǵattap, bilekterin sybandy. Jumabek bul qoqaıdan qaımyǵa qoıǵan joq. Myrzalar Qaraýyldyń, qala berdi Aqan rýynyń súıekteri shirip, jer bolyp ketken ata-babalaryn balaǵattasa, ol kóz aldynda otyrǵan Dúzenniń ózin atady. Buǵan namystanǵan tórt myrza birden Jumabekke qona tústi. Jumabek áp-sátte úırek ustaǵan lashyndaı ústine qona ketti.

Joqshynyń osal adam emes ekendigin, tegin ketpeıtinin sezgen Dúzen balalaryna:

— Árqaısymyzdyń úsh-tórt adamdyq kúshimiz bar deýshi edińder, tórteýiń Qaraýyldyń bir qara domalaq jigitiniń astyna tústińder. Ózimdi tirideı balaǵattatyp, masqaraladyńdar. Jetedi endi, turyńdar, — dep zekidi.

Urlyǵyn moıyndaǵan, kúsh synasýda jeńilgen tórt myrza ákesiniń nusqaýymen kezdeısoq meımandarǵa jaqsy qonaqasy ázirledi, maldaryn moınyna qosaq, quıryǵyna tirkeýmen jetektetip qaıtardy.

---