InfoHub Logo

Kóshede kóńilsiz kele jatqanmyn. Almatyǵa bir-aq sátte kúz keldi. Keshegi shildeniń aptap ystyǵy bir-aq túnde ǵaıyp bolyp, taý jaqtan salqyn aýa shym-shymdap qoınaýyna batyryp aldy arý qalany. Shahardy kóńilsizdik basty. Ol kisini alystan kórip kelemin. Aldymen men baıqadym. Bir-birimizge qasqaıyp qarsy kele jatyrmyz. Kenet ol kisiniń kózi maǵan tústi de qadalyp qaldy. Sodan soń jymıdy. Júrisin jedeldetti. Men  de jymıyp, jaqyndaǵan kezde qolyn aldym. Ol meni baýyryna tartyp, qysyp, betimnen súıdi. Qartaıyp ketipti. Shal bopty deýden aýlaqpyn,  biraq qartamys tartqany anyq. Jaqyn aradaǵy kafege baryp, tamaqtanyp alýdy usyndy. Erigip júrgen men lezde kelistim. Ol kisi ózine shaı ǵana aldy, men laǵman, konák suradym. Jáne, árıne, nan. «Árıne, nan mindetti túrde». «Sharshap júrmin»  dedi ol kisi. «Jalǵyzbyn».  «Áıelińiz qaıda?» «Áıel bar ǵoı, sóılesetin adam joq». «M-m-m...». «Birge jumys istep júrgende men saǵan qyryndap pa edim osy?». «Joq,  eshqashan». «Qyzyq eken». «Meniń qasymdaǵy qyzdardyń barlyǵyna qyryndap shyqtyńyz, biraq maǵan birde-bir ret qyryndap kórmepsiz». «Qyzyq eken». «Bálkim, sizdiń talǵamyńyzǵa kelmeıtin shyǵarmyn». «Joq, kelip tursyń ǵoı, mine». Shylym shekkim keldi. «Siz osy shekpeısiz, ıa?». «Shekpeımin... Odaqqa kúnde baramyn... Bosqa sendelip júrip-júrip qaıtam. Eshkim joq». «Nege joq?». «Meniń dostarymnyń barlyǵy ólip qalǵan, o dúnıede barlyǵy». «Túsinikti...». «Ekeýmiz júrsek qalaı bolady eken, á?». «Bilmeımin, túk qyzyq bolmaıtyn sıaqty». «Sen menimen júrip kórgen joqsyń ǵoı. Júrip kórseń, kete almaı qalatyn ediń...». «Múmkin». «Taǵy konák aldyrtaıyn ba?». «Joq, aǵataı, jumysqa barýym kerek»... «Sharshap júrmin» dedi ol. «Maǵyna qalmady myna tirlikte. Sharshadym. Barlyǵy dalbasa». Qolymdy qysty....

Almatyǵa kúz osylaısha bir-aq túnde keledi.

---