InfoHub Logo

Erteń aýylǵa baramyn. Aýylda tirshilik toqtap qalǵan. Kúndelikti kúıbeńnen ózge aýyldaǵy adamdardy esh nárse tolǵandyrmaıdy. Ol jerdegi mahabbattyń ózi jaıbaraqat. Eshkimniń esi ketip, dúnıeni talaq etpeıdi. Barlyǵy birqalypty, óziniń sharyqtaý shegine enjar jetip,  syrǵyp túsedi de támamdalady. Ne toımen, ne bolmasa bastapqy qalpyna qaıta oralady. Qaladaǵy arpalys, aǵylǵan mashınalar qanyńdy qyzdyryp, júregińniń soǵysyn jyldamdatady. Sondyqtan tezirek aýylǵa ketý kerek. Bir nárse búlinbeı turǵanda, ózińnen de, ómirden de jıirkenip bezip ketpeı turǵanda aýylǵa jetip alý kerek.

Onyń mysyǵy bar. Eresek tarta bastaǵan, uıpa-tuıpa urǵashy mysyq. Balalyǵy qalmaǵandyqtan, ara-tura júgirip oınap alady. Biraq kóbinese mańǵazdanyp, sen jaqqa mensinbeı kóz tastap jatady. Ol maǵan basynda unaıtyn. Tósekke qısaıa qalsań, qasyńa jetip kelip yńǵaılanyp jaıǵasa bastaıdy. Sodan keıin turyp ketý múmkin emes. Kóńilin qımaı jatasyń.

Ol mysyǵyn jaqsy kóredi..

Kúz aıaqtala bastaǵan kezde, mysyq túleýge kiristi. Jer dúnıeniń barlyǵy jún, talshyq. Shaı iship otyryp,tamaǵyńa keptelip qalǵanyn sezesiń. Júregiń aınıdy. Bólmege kún túsken kezde shańmen aralasyp, qalqyp júrgen appaq talshyqtardy kóresiń. Men “mysyqty aparyp tasta” dedim. Ol basynda qarsy bolǵan. Biraq meniń shynymen de qınalyp júrgenimdi kórgennen keıin kelisti. Onyń ústine oǵan birtúrli, jaman  qaraı bastadym. Janýardyń kinási joq ekenin bilip tursam da, keýdemde ornyǵyp alǵan jıirkenish jan-dúnıemdi jegideı jep bitti. Sodan keıin Onyń mysyqqa degen erekshe meıirimi de jynymdy keltire bastady. Birde jumysynan telefon shalyp, mysyqtyń hal-jaǵdaıyn suraǵan.

— Qazir ǵana oqtaýmen basynan bir urdym, — dedim men qaljyńdap.

— Nege?

Daýysy ózgerip ketti..

— Dastarhanǵa shyqqan soń... Ýaıymdamaı-aq qoı. Kishkene qımylsyz jatty da, turyp ketti. Tek basyn silkı beredi.

— Men seni óltiremin.

— Nemene?

— Óltiremin.

— Óltiremin, — dedi ol qaıtalap. Daýysynda yzǵar bar. Denem titirkenip ketken.

Shydamym taýsylyp bitti. Úıde tamaq ishýden qaldym, Aqyry ol mysyǵyn alyp ketti. Dosynyń úıine. Sodan keıin úıge kesh keletindi shyǵardy. Bara-bara bunysy tipti jıilep ketti. Bar aıtatyn ýáji “Mysyqty baryp kórip júrmin”. Shynymen de ol da bir tirshilik ıesi emes pe. Aty-jóni joq dalaǵa laqtyryp tastaýǵa bolmaıdy.

— Qaıta alyp kelemin deseń, alyp kel, — dedim men oǵan bir kúni, — túlep bitken shyǵar.

Ol mysyqtyń ári-beri júrgennen qatty qorqatynyn, sondyqtan janýardy bulaı qınaı bergenniń obal ekenin aıtty. Sonymen, barlyǵy ornyna kelgen sıaqty edi. Biraq búgin tórtinshi kún ol joq.

Dosynyń  úıine habarlasqanymda olar onyń mysyqty alyp ketkenin aıtty. Qaıda ekenin bilmeımiz dedi. Esh jerde joq..

Men aýylǵa ketemin dep sheshim qabyldadym. Biraq eshqaıda barǵan joqpyn. Ony kútip júrmin. Bireýler onyń mysyq jetektep júrgenin saıabaqtan kóripti. Sol jerge bardym. Bir kúni kezdestirdim de. Ol uzyn boıly, deneli jigit aǵasy. Túri de salıqaly, salmaqty. Qarbyǵaý  taǵyp,  jippen mysyq jetektep júrgeni alystan kúlkili kórinedi eken. Qastaryna jaqyndap, mysyqty qolyma aldym.

— Qaıda júrsiń?

— Osynda páter jaldap turyp jatyrmyn.

— Úıge júrmeısińder me?

Ol maǵan synaı qarady.

— Sen mysyqpen birge tura almaısyń ǵoı.

— Tura alamyn.

Ol basyn shaıqady.

Men úıge jalǵyz oraldym. Mysyq kóp degende jıyrma jyl ómir súredi. Sodan keıin onyń jaǵdaıy ne bolady? Bilmeımin.

---