InfoHub Logo

Gúljamal kózin ashqanda, úı qarańǵy bolatyn. Qabyrǵada ilýli turǵan elektrondy saǵatqa kóz saldy. On bir bolyp qalypty. Ol terezeni  eshkimniń ashpaǵanyn túsingen. Kóp ári qatty uıqydan solqyldaǵan basyn qolymen qysyp, syrtqa bettedi. Dalada jańbyr jaýyp tur eken. Sý-sý Aqtós áldenege máz bolyp, arsalańdaıdy. Ol ıtti aıaǵymen teýip jiberdi.

— Ket!

Úıdiń mańynda da eshkim joq tárizdi. Tym-tyrys. Kenet ol baqsha jaqtan áldebir dybys estigendeı boldy. Jaqyndaı kele Maıranyń daýysyn tanyǵan.

Balabaqshadan taǵy qalyp qalǵan bolý kerek. Jylap otyr. Ol adýyńdy adymdap, daýys shyqqan jaqqa bettedi. Tula boıyn kernegen kúshti dál qazir ásirese aıqyn sezingen. Jasy on tórtke tolmaǵan odan mektepte ózinen eki-úsh jas úlken uldar da  jasqanatyn. Túsiniksiz  minezinen be, álde kesken tomardaı kesek jartylysynan ba eshqashan jaqyn qurbysy da bolǵan emes. Shyndap kelgende ol qyzdardy unatpaıdy.  Áljýaz, ne bolsa soǵan kóz jastaryn kól qylyp otyrǵandary. Sonysyna qaramaı olardyń ózi týraly «erkekshora» dep sypsyńdaıtyndaryn qaıtesiń. Aqymaqtar. Qazir de myna qyzdyń botasynan aıyrylǵan ingenshe bozdaǵan daýysy yzasyn keltirgen.

— Ne boldy?

Jylap-jylap qarlyqqan únmen áldeneni byldyrlaı bastaǵan Maıranyń birde-bir sózin túsingen joq.

— Ne boldy deımin saǵan?

— Esi-ikti asha almaı otyrmyn...

— Saǵan dárethanaǵa otyrýǵa bolmaıdy dep aıtyldy ǵoı. Nege kirdiń?!

Maıranyń jylaǵan daýysy zarly shyqty.

— Endi otyr osylaı. Ashpaımyn. Áke-shesheń kórsin myna túrińdi.

Gúljamal jańbyrdyń sýyq tamshylarynan qorǵanatyn jer izdep jan-jaǵyna qarady. Kózine esh nárse iline qoımaǵan soń, nazaryn qaıta dárethanaǵa aýdarǵan:

— Aýyzyndy jap!

— Gúljamal, ash-sh-shy...

— Saǵan aıtyldy ǵoı dárethanaǵa kirme, ishine túsip ketesiń dep, nege tyńdamaısyń?

— Men i-ishi-ine túspeımi-in...

— Sen be? Túskende qalaı túsesiń!

— Túspeımi-in!..

Ol esikti julqyp tartyp qalǵanda, eski aǵash dárethana solq ete túsken. Búrisip buryshqa tyǵylǵan Maırany qolynan tartyp ornynan turǵyzdy.

— Mine, myna tesikke túsip ketesiń. Aldymen bylaı aıaǵyń kiredi. Sodan keıin beliń kiredi.

Janushyra tyrmysqan kishkentaı qyzdyń qobyraǵan uzyn shashy aýzyna kirdi. Ásirese shyrqyraǵan ashshy úni ashýyn qozdyrǵan. Basyn ońaı tyqty. Sodan keıin bylsh etken jaǵymsyz dybys, Maıranyń álsiz qumyqqan úni estildi. Ol keýdesiniń aýyr júk túskendeı jeńildegenin  sezingen. Úıge kirip teledıdardy qosty. Múltfılm kórsetip jatyr eken. Ol tósegine qaıta qulady.

---