InfoHub Logo

«Sarýalynyń aryǵy degen jerde úıir-úıir qulan jatyr» degen habardy estip Joshy hannyń jalǵyz uly óziniń quralaıdy kózge atqan mergenderimen jolǵa shyǵypty. Hannyń uly qulandy kórgennen keıin, ústine qyzyl shekpen kıip, qolyna qarýyn alyp, ordaly qulanmen jalǵyz aıqaspaqshy bolyp, basqalarǵa toqtaý salady. Basqa qý shoqaıly sur mergender saı-saıdyń tasasymen bet-betine ań aýlap ketedi. Sol kezde úıir ishinen hannyń balasyna qarsy shapqan jalǵyz qulan jer tartyp, pysqyryp hannyń balasyn aınala shaýyp oıqastap ótkendeı bolady. Jer betin qara túnek tuman basady. Mergender bir-birinen adasady. Sóıtip júrgende, bir qudiretti óktem daýys: «Qý shoqaılydan qasha júriń, qyzyl shekpendiniń ústin basa júriń!» — dep jar salyp ótedi. Osy óktem únnen keıin lezde qarańǵy túnek seıilip, jer beti jap-jaryq bolyp shyǵa keledi. Endi mergender kelip qarasa, oınaq salǵan qulan da joq, onymen aıqasqan hannyń balasy da joq. Mergenderdiń tapqany hannyń balasynyń jalǵyz shynashaǵy eken. Sol shynashaqty alyp, olar aýlyna qaıtady.

Han óziniń balasynyń oralmaǵanyna kúıinip qaharyna minip, elge jarlyq aıtady:

— Meniń balam aman-esen oralatyn bolsyn! Balamnyń sýyq habaryn estimeıtin bolaıyn. Kimde-kim «óldi» degen habar aıtsa, kómeıine qorǵasyn quıǵyzamyn. Balamnyń bir habaryn estimeıinshe, azyq-túlik berý toqtatylsyn, — dep habarlap, búk túsip jatyp alady. Habarshy bolyp hannyń aldyna barýǵa jan shyqpaıdy. Sóıtip, qalyń el qatty toryǵyp, kúızelip turǵanda Kerbuqa degen dombyrashy shyǵyp:

— Balasynyń ólimin dombyramen men estirteıin, — dep dúıim jurtty ózine qaratady. Hannyń bosaǵasyna kelip, tizelep otyryp bir kúı bastaıdy. Bul kúıi qulannyń júrisi men aıbar shekken sátin sýretteıdi. Ekinshi kúıin shalady. Bul kúıde han balasynyń qaza bolǵany anyq aıtylady. Sonda muny túsingen han basyn kóterip:

— Seniń myna kúıiń «Balań óldi, Joshy han» dep tur ǵoı, —  dep til qatady. Sonda Kerbuqa:

— Eı, taqsyr! Balańyzdyń ólgendigin óz aýzyńyzdan estip otyrmyn, — depti. Sonda, han qatty qapalanyp: «Qap, men sózden jyǵyldym. Qorǵasyndy dombyranyń kómeıine quıyńdar! Dombyrashyny aıdahar aldyna aparyp tastańdar! Jylan jutsyn» dep buıyrǵan eken. Dombyrashy jylannyń aldynda da kúı tartady. Jylan kúıge balqyp, baýyryn jazyp, tumsyǵymen, judyryqtaı altyndy kúıshiniń aldyna domalatyp ákep tastaıdy. Kerbuqa ólimnen qutylyp, eńiregen eldiń batasyn alyp, oljaǵa batyp, jónine ketedi.

---