InfoHub Logo

Ótken zamanda, bir kedeıdiń jalǵyz kók tulpary bolypty. Ózi jýas, biraq júırik bolsa kerek. Kedeı onymen ańǵa shyǵyp, kúneltis etedi eken. Ańda júrgende qasqyr, túlkilerdi tulparmen qýyp, soǵyp ala beredi. Tulpardyń bir qasıeti — teri shyqpasa, shaba almaıtyn bolǵan. «Attyń syry ıesine málim» degendeı, ańǵa shyǵardyń aldynda eki qanjyǵasyna eki dorba qumdy óńgerip alyp, árli-berli aıańdatyp, jeldirtip, kók tulpardyń terin shyǵaryp alady eken.

Bir kúni elde úlken toı bolyp, soǵan jer-jerden ánshi-kúıshiler, aqyndar, palýandar, baı-bıler sáıgúlik júırik attarymen keledi. Toı bastalyp, oıyndar ótip, kezek attardyń jarysyna qalady. Báıgige daıyndalǵan sáıgúlikter kóp eken. Bári de birinshi júldeden úmitker. Osy jarysqa kók tulpardy da qosaıynshy dep, tulpardyń ıesi, at aıdaýshy kelgenshe kók tulpardyń terin shyǵarý úshin, qanjyǵasyna qum óńgerip, tulpardyń tepeńdetip jortyp júredi.

Kóp keshikpeı at shabys bastalady. Birinshi bolyp kók tulpar keledi. Báıgi alǵannan keıin tulpardyń ıesi, atyna razy bolyp, jarys aldynda tepeńdetip, jortqanyn esine túsirip, «Tepeńkók» dep kúı tartypty.

 

---