InfoHub Logo

Ertede taý bókterinde jatqan jylqylardy urylar aıdap ketýli. Jylqy ishinde Bozaıǵyr bar eken. Ol úıirden uzap alysqa ketpeı, shet jaǵynda jaıylyp júrse kerek. Urylar jylqylardy qýǵanda Bozaıǵyrdy da úıirimen qosa áketken. Jolda úsh kún bolyp, tórtinshi kúni jerdiń, ony aıdap kele jatqan adamdardyń bóten ekenin sezgen Bozaıǵyr aınala pysqyrynyp, aýylyna qashyp keledi. Bozaıǵyrdyń úıirinen bulaısha bólinip kelýi tegin emes ekenin bilgen baıdyń balasy, aıǵyrdy júgendep, erttep, qarý-jaraǵyn asynyp, jylqynyń sońynan qýady. Jylqyǵa jetip, aldyn orap úıirdi keıin qaıyrady. Muny kórgen qaraqshylar jan-jaqtan qaýmalap balany ortaǵa alyp, qolǵa túsirip, qorlamaqshy bolady. Biraq olardyń bul oıyn túk shyqpaıdy. Óıtkeni bala Bozaıǵyrmen bir shetke shyǵyp, urylarǵa tutqıyldan tıisip, ekeýin qulatady. Qyzyp alǵan aıǵyr men qaıta shaýyp, qaraqshylardyń taǵy ekeýin túsirip, aýylǵa qaraı jylqymen bet burǵanda, balanyń endi ustatpaıtynyna kózderi jetken urylardyń tiri qalǵany ony bilteli myltyqpen atyp, sanynan jaralaıdy. oq tıgen bala burynǵydan da
beter óshigip, tula boıyn yza kernep, jaraly sanyn qyl belbeýmen qatty tańyp, qaraqshylarǵa qaıta tıisedi. olardyń qalǵandaryn qulatyp, jylqyny aıdap aýylǵa qaıtady. Jolshybaı bir tóbeniń etegine jetip, ilgeri júrýge shamasy kelmeı qansyrap, atynan jyǵylady. Bozaıǵyr ári-beri oqyranyp, balanyń qasynan kete almaı, aqyry bolmaǵan soń aýylǵa tartady.

Balanyń ákesi Bozaıǵyrdy kórip, «balam ólgen eken, endi ne bolsa da izdeıin» dep jolǵa shyǵady. Bozaıǵyr ıesine bas bermeı, taýda qalǵan balaǵa qaraı ony ala jóneledi. Kelse, shynynda da bala ólipti. Balasynyń ólimine ákesi qatty qaıǵyryp, jylap-eńirep otyrǵanda qasynda turǵan bozaıǵyr oqyranyp, kisineıdi. Taǵy da urylar kelip qalǵan eken dep, baı záresi ketip ornynan ushyp tursa, eriniń qasyna ilgen dombrasy bar, salt atty jalǵyz júrginshi eken. Jolaýshy balanyń janyna kelip, ákesine kóńil aıtady. Baı bolǵan jaǵdaıdy oǵan túgel
baıandaıdy. Sonda jolaýshy:

— Shirkin, janýarym-aı! At bolsa osyndaı, er bolsa seniń balańdaı bolsyn! «Jaqsy at er súıegin dalaǵa tastamaıdy» degen osy da. Balańa astyndaǵy aty saı eken. Jaqsy at erge qanat bitiredi degen. Myna jaǵdaı dál soǵan keledi, — dep, dombyrasyn alyp, bir kúıdi tartypty. Kúı kúńirene baryp aıaqtalǵanda balanyń ákesi:

— Zamandas! Myna tartqan qaıǵyly sazyńyzdyń aty qalaı? — dep suraǵanda dombyrashy:

— Baýyrym, myna turǵan Bozaıǵyrǵa razy bolyp, soǵan arnap tarqan kúıim edi, atyn «Bozaıǵyr» qoıdym. Bul aıǵyr bolmasa, balań qaıda qalar edi, sen onyń súıegin qaıdan tabar ediń? — depti.

---