InfoHub Logo

Úlken qaladaǵy sáýletti saraılardyń tasasyndaǵy eski úıde qaltyldap áreń qozǵalatyn, appaq juqa shashy jelkesin japqan qarıa turady. Onyń jalǵyz sary ala mysyǵy bolatyn. Jumsaq júniniń myj-myjy shyǵyp qashan kórseń de uıyqtap jatatyn jalqaý, semiz mysyq. Mıaýlaǵanyn nemese áldebir shalt qımyl jasaǵanyn eshkim kórgen emes. Erinshek. Olar eleýsiz, eski úılerinde ekeýden-ekeý uzaq turdy. Tańerteń qolyna baıanyn alyp ketetin qart tús aýa nan, sút, keıde tipti qaımaq alyp oralady. Al, bir kúni kútpegen jerden Qarıa úıge áldekimdi alyp keldi.

— Mine, mynaý bizdiń úı, sen de eńdi osyńda turasyń. Qoryqpa, qoryqpa.

Tań qalǵan Mysyq eki kózin birdeı ashyp qulaqtaryn tikireıtip aldy.

— Mine, mynaý Mysyq.

Túkke túsinbeı qarıaǵa qaraǵan ol onyń qolyndaǵy kishkentaı jap-jasyl totyqusty endi baıqady. Jan-jaǵyna muqıat zer salyp qarap alǵan qus kenet shıq ete qalǵan. Sodan soń taǵy bir ret, sodan soń taǵy. Ózi ábden sózsheń eken. Názik, beıkúná únmen úzdiksiz shıqyldaıdy. Áldenege qaıran qalady. Áldeneni jaqtyrmaıdy. Ursady, kúledi ishek-silesi qatyp. Áıteýir kún demeı, tún demeı sóıleı beredi, sóıleı beredi…

Mysyq aldymen bul qaı mazaǵyń degendeı Qarıaǵa uzaq qaraǵan. Onyń qalbalaqtap birese jem, birese sý qoıyp ábigerge túsken keıpin kórgen soń moınyn terezege burdy. Sodan keıin basyn baýyryna tyǵyp kózin jumǵan. «Bilgenin istesin». Al Qarıa baqytty edi. Túsinen shyqpaıtyn qus bul. Sóıleıdi! Qarıany basqan izinen qalmaı ushyp ıyǵyna, tóbesine qonady. Baqytty edi qarıa.

Osylaısha birshama ýaqyt ótti. Bir kúni ádettegideı tús aýa sút, nan, jem alyp kelgen Qarıany Únsizdik qarsy aldy. Júregi aýzyna tyǵylǵan.

— Totyqus?! Totyqus, qaıdasyń? Myshym, Totyqus qaıda?

Mysyq basyn da kótergen joq.

As úı, jýynatyn bólme, dárethana… Esh jerde joq. Kenet qarıanyń kózi buryshta shashylyp jatqan jasyl qaýyrsyndarǵa tústi.

— Mysyq?

Qaltyraǵan denesine ıe bola almaǵan Qarıa jerge otyra ketken.

— Onyń ne, Myshym? Nege?

Ájim basqan júzindegi salalardy qýalap jas aqty kózinen.

— Myshym, onyń ne?! Onyń ne? — deı berdi qaıta-qaıta.

Sodan soń kenet ornynan turdy da qataıǵan daýyspen:

— Senimen birge endi tura almaımyn Shyq, úıden! Bar! — dedi.

Mysyq eppen kóterilip tósekten sekirip túsken.

— Ket!

Ol ashyq jatqan esikten shyǵa jóneldi. Artyna burylǵan joq.

Osylaısha Qarıa eski de eleýsiz úıde múlde jalǵyz qaldy.

---