InfoHub Logo

Aqtóbede oblystyq bilim salasyn baqylaý departamentiniń burynǵy basshysy Ákimgereı Kósherbaev pen onyń áıeli Saǵadat Syrbaevanyń soty ótti, dep habarlaıdy mgorod.kz.

Tergeý málimetteri boıynsha, Kósherbaev oblys mektepterin attestasıadan ótkizip, oń baǵalaý úshin para alǵan. Joǵary laýazymdy sheneýnik 2015-2016 jyldary ózgeniń múlkin jymqyrý maqsatynda Shalqar aýdanyndaǵy bastaýysh synyp meńgerýshisi men Qos İstek orta mektebiniń dırektorynyń orynbasary arqyly para alyp otyrǵan. 

Tergeýshilerdiń anyqtaýynsha, qarajat mektepterdiń attestasıadan ótý máselesin sheshý úshin berilgen. Memleketke keltirilgen shyǵyn 600 000 teńgeni qurady. Sottalýshy tergeý bastalǵan sátten beri óz aıybyn moıyndaǵan emes.  Degenmen, burynǵy baqylaýshy jalpy rejım kolonıasyna 3 jylǵa qamaldy jáne múlki tárkilenip, ómir boıy memlekettik organdar men mekemelerde jumys isteýge tyıym salyndy. Sottalýshynyń áıeli de dál osyndaı qylmys boıynsha aıyptalýda. Saǵadat Syrbaeva Elek orta mektebiniń dırektory bola tura, 50 000 teńge para alǵan. Bul aqshany oǵan deldal Aqtóbe q. №18 mekteptiń attestasıadan ótkizý týraly kúıeýine ótinish jasaý úshin bergen. Sot úkimimen Kósherbaevtyń áıeli bir jylǵa bas bostandyǵynan aıyrylyp, múlki tárkilendi jáne 60 saǵat jergilikti basqarý organdary belgilegen orynǵa májbúrli eńbekke tartylý túrindegi jaza berildi. 

---